Дәрілік заттар мен медициналық бұйымдарды ұлттық сараптау орталығының үйлестірушісі, медицина ғылымдарының кандидаты Сәуле Бүркітбаева вакцина сапасы қалай тексерілетінін түсіндірді, деп хабарлайды ҚазАқпарат.
«Вакцинаны тексеру алдында сарапшыларымыз вакцина шығаратын өндіріске барып, жабдықтарын, мүмкіндіктерін, барлық жағдайын стандарттар мен алгоритмдер бойынша тексереді. Мұнан соң сарапшылар вакцинаға берген құжаттардың, яғни эпидемиологиялық тиімділігін, иммуногендік қасиеттерін, клиникаға дейінгі клиникалық зерттеулердің, тіркеуден кейінгі зерттеулердің нәтижесіне берілген мәліметтерді дәлелдейтін құжаттарға талдау жасап тексереді. Содан кейін барып біздегі ұлттық және халықаралық стандарттар бойынша аккредитациядан өткен Дәрілік заттар мен медициналық бұйымдарды ұлттық сараптау орталығының зертханаларында тағы да тексеруден өтеді», - деді ол.
Сарапшының атап өтуінше, аталған зерттеулердің қорытындысына сүйене отырып, мемлекеттік уәкілетті орган вакцинаны тіркеу туралы куәлік беруге шешім қабылдайды.
Қазіргі таңда мемлекеттік дәрілік заттар мен медициналық бұйымдардың тізімінде Бельгия, Франция, Нидерланды, Ресей, Қытай, Үндістан, Корея және Израиль сынды елдердің ірі өндірушілерінің 64 вакцинасы тіркелген. Оның ішінде М.Айқынбаев атындағы карантиндік және зооноздық жұқпалар Қазақ ғылыми орталығында жасалған бір отандық вакцина бар.
«Вакцина Қазақстанға жеткізілгеннен кейін де әрі қарай зерттеу жүргізіледі. Вакцинаны қолдану кезіндегі жағымсыз әсері туралы мәліметтер жинақталатын, талданатын әрі бағаланатын фармакологиялық бақылау және оларды қауіпсіз қолдануды бақылау жүйесі жұмыс істейді. Яғни, вакцина Қазақстанға келгеннен кейін оның әр сериясына, топтамасына бақылау жүргізіліп отырады. Мониторинг барысында болатын жағымсыз реакциялар, барлық анықталған жағдайлар талданады», - деді Сәуле Бүркітбаева.
Оның атап өтуінше, вакцинаны қолданған кезде болатын жанама жағымсыз әсерлер нұсқаулықта толық жазылады.
«Тағы бір айтып кететін жайт, Қазақстандағы вакцинаның басым көпшілігі - Дүниежүзілік денсаулық сақтау ұйымының дәрілік заттар преквалификациясынан өткен, тиісті өндірістік стандарттарға сәйкес жасалған вакциналар»,- деді ол.
1305 рет оқылды
