Бүгін Үкімет отырысында Түркістан облысының әкімі Өмірзақ Шөкеев былтырғы Арыс тәжірибесі сияқты әр үйге келген зардапты, шығынды есептеп шығуымыз керек екенін айтты, - деп хабарлайды «Ұлт ақпарат».
«Мақтаарал ауданында су басқан ауылдардың эвакуацияланған әр тұрғынына өтемақы белгілеу дұрыс деп есептеймін. Су елді мекендерден кеткеннен кейін үйлерді аралап, былтырғы Арыс тәжірибесі сияқты әр үйге келген зардапты, шығынды есептеп шығуымыз керек. Ары қарай комиссиямен бірігіп отырып, бүлінген үйлерді қайта қалпына келтіру жолдарын қарастырымыз керек деп олаймын»,- деді облыс басшысы.
Өңір басшысы су басқан үйлерде қалған мүліктерге қандай зардап келгенін есептеу қиын болатындығын баса айтты.
«Сондықтан су басқан ауылдың эвакуацияланған әр тұрғынына өтемақы белгілеу дұрыс болар деп есептеймін. Мұнан бөлек 7 мыңнан астам егістік алқабына біраз шығын келді. Егілген егістік, пленка астында жатқан әртүрлі егістік алқабы бар. Соның бәрін қайта есептеп, оны да өтеуге көмектесуіміз қажет. Жалпы, эвакуацияланған азаматтардың бәрімен түсіндіру жұмыстары жүргізіліп жатыр. Былтырғы Арыстағыдай көп адамды жинап, үлкен жиын жасамаймыз. Жеке-жеке әр мектепке барып, түсіндіру жұмыстары жүргізілуде. Жалпы халық түсіністікпен қарайды, үлкен шыдамдылықпен, төзімділікпен бұл жағдайды өткізіп жатыр. Біз комиссияны күтіп отырмыз, солармен бірге бәрін аралап шығамыз»,- деді ол.
1227 рет оқылды
