21 жастағы оралдық студент Эльдар Ғабдуллин битбокстан онлайн түрде АҚШ-та өткен халықаралық жарыста жеңімпаз атанды, - деп хабарлайды "Ұлт ақпарат".
Чемпионаттың барлық үш кезеңі онлайн режимде өткен. Эльдар финалға ұсынған шығармасын желідегі проблемаларға байланысты, бірнеше рет қайталап жазуға мәжбүр болған. Бірақ, бұл оған кедергі болмады. Бірінші орын үшін оған 500 доллар ақшалай сыйлық және келесі чемпионаттарда қатысушыларды бағалау мүмкіндігі берілген.
Эльдар битбоксты меңгеруді YouTube көмегімен 2015 жылы, небәрі 15 жасында бастаған. Ол ата-анасы бастапқыда қарсы болғанын, оның өнерін енді ғана қолдап, түсіне бастағанын айтты.
"Менің музыкалық білімім жоқ. Бала кезімнен бірнәрсемен айналысқым келді. Бимен, вокалмен айналыстым. Бірақ басқа дүниені қалайтынымды түсіндім. Кейін ойламаған жерден YouTube-тағы битбоксшылар видеосына тап болдым. Ол кезде бұл салада Қазақстанда ешкім жоқ еді. Мен осы салада бірінші болуды ойладым. Осы ой маған мотивация берді", - деді ол.
Эльдар - студент. Мамандығы - ағылшын тілі мұғалімі. Сондай-ақ, ол оқу орталығында сабақ береді.
2115 рет оқылды
