Кеше, 13 мамыр күні болған нөсер жаңбырдың салдарынан Өзбекстандағы бірнеше аудан аумағын сел басты, деп хабарлайды ӨзА агенттігі.
Атап айтқанда, Ташкент облысы Бостандық ауданының бірнеше таулы аймақтарында орналасқан елді мекендердің көшелерін, үйлердің аулаларын су басып қалды. Оқиға орнында 189 құтқарушы мен 26 арнайы техника жұмыс істеп жатыр.
Сондай-ақ, Сұрхандария облысының Байсын және Алтынсай аудандары аумағындағы Алтынсай арнасының тасу қаупіне орай ондағы 900-дей азамат уақытша эвакуацияланды және көлік қатынасы уақытша тоқтатылған. Тасқын салдарын жоюға 150-ден астам қызметкер, сонымен қатар 20-ға жуық техника тартылды.
Мұндай жағдай Науаи облысы Зарафшан, Нұрата аудандарында да байқалған. Мұнда 300-дей азамат 9 автокөлік және 70 жеке құрамның көмегімен қауіпті аймақтан көшірілді.
Облыстық ТЖМ хабарлауынша, адам шығыны болмаған.
907 рет оқылды
