Жуырда отандық журналистердің бірі өзінің Instagram парақшасында Сәкен Майғазиевтің гонорар ретінде алған 5 млн теңгесін қайырымдылыққа бергенін жазды. Әншінің өзі бұл жайтты жасырса да, журналист жазбаны бұл туралы барша Қазақстан білуі тиіс деген ниетпен жариялағанын түсіндірді. Кейін журналистің бұл сөздерін әншінің өзі де растап, көп ақшаның өзіне қайдан келгенін түсіндірді, деп жазады Sputnik Қазақстан.
Әнші бұл соманы Қазақстандағы беделді компанияның таныстырушысына айналғандықтан алған.
"Журналист қарындасымның бұл оқиғаны өз парақшасында бөлісіп, кейін жариялағаны үшін кешірім сұрағаны бар. Ол "Аға, жариялағаныма ренжімеңіз, одан сіздің сауабыңызды Алла қаласа кемітпес, іштегі ниетіңіз белгілі ғой. Мүмкін бұл әрекетіңізбен басқа адамдардың жақсы ісіне себепші боларсыз" деп айтты маған", — деп Сәкен Майғазиев мұны жұртқа жария еткісі келмегені туралы жазды.
Әрі қарай жұлдыз мұны дәулеті асып-тасығаннан жасамағанын, өзінің де жақындары материалдық құндылықтарға мұқтаж екенін жеткізді.
"Несиесі бар туыстарым да бар. Яғни ешкімнің төрт қабырғасы түгел емес. Аға-әпке, іні-қарындастарым да қиналып жүр. Десе де, біздің әулетімізден де нашар өмір сүріп жатқан қаншама отбасы бар. Сол адамдарға септігім тигенін қаладым", — деп сөзін жалғады әнші.
Десе де, Майғазиев әлеуметтік желіде кез келген адамға көмек қолын соза бермейтінін жеткізді. Көмек туралы өтінішті жарнамаламас бұрын әбден ойланады екен.
"Жарнама жасап беру жөнінде қандай ұсыныс түссе де, жеті рет өлшеп бір рет кесуге тырысамын. Өзім жетік білмейтін, күмәнды дүниелерге мүлдем жоламаймын. Мен үшін мені оқып отырған оқырмандарымның сенімі әлдеқайда қымбат. Шынымен халыққа пайдалы дүние болса, кейде қолдау көрсетіп, ешкім сұрамаса да жарнамалап жатамын өзім-ақ", — деді ол.
2739 рет оқылды
