Қызылордалық полицейлер демалыс паркіндегі аттракционның ең жоғары биіктігінен секіріп суицид жасамақ болған азаматты құтқарып қалды, деп хабарлайды "Ұлт ақпарат".
Бұл оқиға 26 тамызда түнгі уақытта болды. Белгісіз азамат полицияға хабарласқан. Онда қалалық мәдени-демалыс паркіндегі аттракционның ең жоғары биіктігінен секіріп, өзін-өзі өлтіретінін айтқан.
«Дереу оқиға орнына жеткен учаскелік полиция инспекторы, полиция лейтенанты Бақытжан Досмағамбетов пен жедел уәкіл, полиция лейтенанты Айдос Амангелдиев аттракционның жоғары жағына шығып кеткен адамды көрді.
Полиция қызметкерлері әлгі азаматпен келіссөз жүргізіп, райынан қайтарды. Артынша темір баспалдақпен жоғары көтеріліп, оны жерге түсірді. Осылайша тәртіп сақшылары қайғылы оқиғаның алдын алды», - деп мәлім етті Қызылорда облыстық полиция департаменті.
Өзін-өзі өлтірмек болған азаматтың жеке басы анықталды. Ол Қызылорда қаласының 28 жастағы тұрғыны болып шықты. Ер адам полиция басқармасына жеткізілді. Оның ішімдік ішкені белгілі болды. Полицейлер болған оқиғаның мән-жайын анықтауда.
547 рет оқылды
