Астана қаласының Мәдениет және спорт басқармасы Конституция күні елордада өтетін шаралар тізімін ұсынады, деп хабарлайды ҚазАқпарат.
30 тамызда Қазақстанның маңызды мемлекеттік мерекелерінің бірі - ҚР Конституциясы күні аталып өтеді.
Мерекеге орай ұйымдастырылған қазақстандық эстрада жұлдыздарының концерті қала әкімдігі маңындағы алаңда өз көрермендерін күтеді. Онда Ғаділбек Жанай, Дастан Оразбеков, Гүлнұр Оразымбетова, Бейбіт Қорған, Маржан Арапбаева, Алмас Кішкенбаев сынды өнер жұлдыздары Астана тұрғындары мен қонақтарына мерекелік көңіл-күй сыйлайды. Шара сағат 18.00-де басталып, 23.00-ге дейін жалғасады.
Конституция күніне арналған концерттік бағдарламалар «Думанды Сарыарқа» бағдарламасы шеңберінде Астана маңындағы барлық аудандарда жалғасын табады. Танымал орындаушылар, би және музыкалық ұжымдар, елордалық қуыршақ театрының артистері, аниматорлар және цирк артистері қала маңындағы 10 тұрғын алапта - Пригородный, Интернациональный, Мичурино, Күйгенжар, Өндіріс, Железнодорожный, Үркер, Көктал, Промышленный және Казгородокта қызықты ойын-сауық өткізеді. Концерттерді сағат 15:00-ден 19:00-ге дейін тамашалауға болады.
Айта кетейік, 1 маусымнан бері қала маңында ұйымдастырылып жүрген «Думанды Сарыарқа» концерттері 2 қыркүйекке дейін жалғасады. Шаралар ашық алаңдарда тегін өтеді.
Сәкен Сейфуллин атындағы музейде ҚР Конституциясы күніне арналған «Ата заң - азаттықтың алтын арқауы» атты көрме ашылды. Экспозиция сағат 10:00-нан 18:00-ге дейін өтеді және 31 тамызға дейін жалғасады. Сонымен бірге, «АЛЖИР» музейі мен Тәуелсіздік сарайында да тақырыптық кештер өтеді.
Одан бөлек, 29 тамызда Конституция күніне орай «Барыс Арена» мұз айдыны сарайында «Астана Дауысы» екінші халықаралық фестивалі өтеді. Шара аясында әлемнің түрлі мемлекеттерінің қазіргі заманғы музыка орындаушыларына мүсіншелер табыстау рәсімі өтеді. Сахна төрінде «Евровидение-2012» байқауының жеңімпазы Loreen, Интарс Бусулис, СЕВАК, Согдиана, ALEKSEEV, Григорий Лепс, Ани Лорак және Филипп Киркоров, сондай-ақ Грузия, Швеция, Латвия, Молдова, Армения, Өзбекстан, Украина, Ресей және Қазақстанның музыкалық рейтингтерде көш бастаған артистері өнер көрсетеді. Билет құны - 1000-15000 теңге аралығында болмақ.
2914 рет оқылды
