06 қаз, 2021 сағат 16:16

«Халық санағы видеобайланыс арқылы өткізілуде»: Ақпарат – фейк

Ұлттық статистика бюросы «Бейнебайланыс арқылы халық санағы өтіп жатыр» деген аудиожазбаға пікір білдірді, деп хабарлайды ҚазАқпарат.

«Танымал мессенджерлер арқылы әлдебір азаматтар «Халық санағы» аясында бейнебайланыс арқылы сауалнама жүргізіп жатқандығы туралы аудиожазба тарауда. Осыған байланысты интервьюерлер респонденттермен тікелей, жүзбе-жүз кездесу арқылы, планшетті қолдана отырып, санитарлық талаптарды сақтап, жауап алатындығын хабарлаймыз. Қашықтан, яғни телефон, бейнебайланыс, мессенджерлер арқылы сауалнама жүргізу қарастырылмаған», - деп мәлімдеді Ұлттық статистика бюросының баспасөз қызметі.

Бұған дейін айтылғандай, «Халық санағы» сауалдарына жауап беру үшін бірнеше тәсіл қарастырылған. 1 қыркүйектен бастап елімізде онлайн санақ басталды. 15 қазанға дейін респонденттер санақ парақтарын sanaq.gov.kz арнайы сайты, E-Gov порталында тіркелу және Aitu мобильді қосымшасын пайдалану арқылы толтыра алады.

Қазанның 1-30 аралығында санақшылар азаматтарды толық қамту мақсатында үйлерді аралайды. Үйлерді аралау кезеңінде интервьюерге арнайы куәліктер мен Ұлттық санақтың логотипі бейнеленген көк түсті шарф пен сөмке беріледі. Куәлікте аумақтық статистика департаменті басшысының қолымен және мөрімен расталған интервьюердің фотосуреті, толық аты-жөні болады. Куәліктің жоғарғы бөлігінде тіркеу нөмірі көрсетіледі. Бұл нөмірді sanaq.gov.kz сайтында «Интервьюерді іздеу» жолағына енгізуге болады, содан кейін сайтта интервьюердің деректері көрсетіледі. Сондай-ақ, интервьюердің жеке басын 1446 нөміріне қоңырау шалу арқылы да тексеруге болады.