12 қаз, 2020 сағат 08:30

Қазақстандық теннисшілердің рейтингтегі жаңа орны белгілі болды

Қазақстандық теннисшілердің рейтингтегі жаңа орны белгілі болды, деп хабарлайды "Ұлт ақпарат".

Әйелдер теннис қауымдастығы (WTA) жария еткен рейтингте Қазақстанның бірінші ракеткасы Елена Рыбакина 18-ден 19-сатыға сырғыды.

Бұл 19 жастағы Польша өкілі Ига Швентектің Ролан Гаррос турнирінде тамаша өнер көрсетіп, жеңімпаз атануына байланысты болып отыр. Ол бірден 36 орынға жоғары көтеріліп, әлемнің 17-ракеткасы атанды.

Тағы бір қазақстандық Юлия Путинцева 27-орнын сақтап қалса, Зарина Дияс 77-ден 79-ға төмендеді.

Көш басындағы үздік үштік (аустралиялық Эшли Барти, румыниялық Симона Халеп, жапониялық Наоми Осака) өзгеріссіз қалды.

Жұптық сында Галина Воскобоева 69-дан 70-ке, Анна Данилина 131-ден 134-ке, Ю.Путинцева 180-нен 182-ге жылжыды.

Ерлер арасында кәсіби теннисшілер қауымдастығы (ATP) жариялаған рейтингте Қазақстаннан бірінші болып келе жатқан Александр Бублик 49-дан 52-ге сырғыды. Михаил Кукушкин 88-орнын сақтап қалса, Дмитрий Попко 171-ден 178-ге төмендеді.

Рейтингте бұрынғыша сербиялық Новак Джокович, испаниялық Рафаэль Надаль, аустриялық Доминик Тим алда келеді.

Жұптық сында М.Кукушкин 74-тен 75-ке, Андрей Голубев 84-тен 86-ға, А.Бублик 106-дан 108-ге сырғыса, Александр Недовесов 132-ден 136-ға көтерілді.

Қазақстандықтар алдағы жарыстарда сәтті өнер көрсетсе, рейтингтегі орнын жақсарта алады. Бүгін А.Бублик Санкт-Петербург додасында рейтингте 221-орында тұрған америкалық Маккензи Макдональдпен кортқа шығады. Ал М.Кукушкин ертең әлемнің 41-ракеткасы, сербиялық Миомир Кецмановичпен ойнайды.