Фото: ҚР Қорғаныс министрлігі
Қазақстан Қарулы Күштерінің әскери қызметшілері қысқы далалық киімнің жаңа үлгісін ресми түрде қабылдады. Бұл өзгеріс 2023 жылғы мамыр айында өткен бүкілармиялық кеңесте талқыланып, ҚР Президентінің 2023 жылғы 12 желтоқсандағы Жарлығы аясында жүзеге асырыла бастады, деп хабарлайды Ult.kz.
Қарулы күштердің Тыл басшысының орынбасары, полковник Әсет Оразалиннің айтуынша, ерекше жағдайлар туындаған кезде басқа әскерлер Қарулы Күштерге бағынады. Сол себепті, климаттық ерекшеліктерді ескеретін және жасыру қасиеті бар біркелкі форма қажеттігі туындады. MultiCam үлгісін таңдау әлемдік тәжірибелер негізінде жасалды, бұл түстер өсімдіктер, қала құрылысы, шөлді, тасты жерлерде жоғары жасыру мүмкіндігін қамтамасыз етеді.
Киімнің ерекшеліктері мен артықшылықтары
Жаңа киім үлгілері қызметке ыңғайлы болуымен ерекшеленеді. Мойынды ауа райынан қорғау үшін пішімі жетілдірілген, ал кеуде қалталарының көлбеу орналасуы құжаттарды сақтауға ыңғайлы етеді. Киімнің шалбар белдігі денеге жақсы сәйкес келеді, ал реттелетін элементтері пішінге үйлесімділік береді.
Қысқы киім үлгісінде материалдың су, аяз және желге төзімділігі күшейтілген. Сонымен қатар, жаңа үлгіде жылы тоқылған қалпақ пен жүннен жасалған шарф қарастырылған. Маусымдық плащтың орнына куртка қосылды, ал күнделікті жемпір орнына далалық жемпір берілетін болды. Жазғы етіктердің түсі қарадан құм түске ауыстырылып, басқару органдарының әскери қызметшілері үшін биік қонышты етік тактикалық кроссовкаларға ауыстырылды.
Экономикалық тиімділігі
Бұл өзгеріс киім-кешек шығындарын қысқарту есебінен жүзеге асырылуда. Оңтайландыру нәтижесінде жыл сайынғы қажеттілік 140 млн теңгеге қысқарды. Қоймалардағы бұрынғы киімдер мерзімді қызметтегі сарбаздар мен әскери міндеттілерге жұмыс киімі ретінде қолданылып, жыл сайын 400 млн теңге көлемінде қаражат үнемдеуге мүмкіндік бермек.
Әскери киім-кешек тек қазақстандық кәсіпорындарда жасалып, отандық өндірушілерді қолдауға бағытталады.
977 рет оқылды
