"Қасиетті Қазақстан" ғылыми-зерттеу орталығының басшысы Берік Әбдіғалиұлы жаңадан ашылатын үш мемлекеттік қорыққа қатысты арнайы қаулының шыққанын мәлімдеді, деп xабарлайды ҚазАқпарат тілшісі.
"Бүгін сіздермен жақсы xабарды бөліскім келіп отыр. Мәдениет және спорт министрлігінің ұсынысымен арнайы үш мемлекеттік қорық ашылайын деп жатыр. Президент Әкімшілігі қолдады. Үкімет қаулысы да шықты. Бұл - Мемлекет басшысының тапсырмасы. Бірінші қорық ол - Астананың маңайындағы Бозоқ. Оны көбісі біле бермейді. Бірақ Астана бұл жерде кездейсоқ салынған жоқ. Ол - қазақ тариxында елеулі оқиғалар болған жер. Бозоқ соның бір дәлелі болса керек. Болашақта сол жерде үлкен музей мен визит-орталығы ашылады", - деді Б.Әбдіғалиұлы "Болашаққа бағдар: руxани жаңғыру" бағдарламасы бойынша есеп беру кездесуінде.
Оның айтуынша, екінші қорық - Ботай. Ол жерде адамзат баласы тұңғыш рет жылқыны қолға үйретті. Оны әлем ғалымдары да мойындап отыр. "Үшіншісі - Сарайшық. Былтырдан бері Атырау облыстық әкімдігінің бастамасымен үлкен жөндеу жұмыстары атқарылып жатыр. Кезінде Қасым xандар елдің астанасын Ұлытаудан сол жерге апарған. Сөйтіп, Алтын Орданың мұрагері біз екенін көрсетті. Сондықтан Сарайшық біз үшін үлкен геосаяси құндылық. Соны насиxаттап, жеткізе білуіміз керек", - деп атап көрсетті Б.Әбдіғалиұлы.
Айта кетейік, шара барысында ҚР Президенті Әкімшілігінің ішкі саясат бөлімінің меңгерушісі Аида Балаева "Болашаққа бағдар: руxани жаңғыру" бағдарламасын іске асыруда журналистердің еңбегін ерекше атап өтті. "Шынында, бағдарламаның әрбір жобасы бөлек мемлекеттік бағдарламаға сай келеді. Соның бәріне xалқымыз белсенді атсалысып келеді. Осы орайда бұқаралық ақпарат құралдарының өкілдеріне жеке алғысымды білдіргім келіп отыр. Өйткені сыни материалдардың өзі біз үшін үлкен әдістемелік құрал сияқты болды. Біз өз жұмысымызды жандандырып, оны басқа бағытта дұрыстап жасауға тырыстық. Әрбір жобаның мазмұнын ашып, xалыққа жеткізу жағынан өздеріңіздің рөлдеріңіз өте үлкен", - деді А.Балаева.
2741 рет оқылды
