Қазақстан көкпар федерациясының президенті Ерлен Оспанов жартылай финалда қазақ көкпаршылары лайықты деңгейде өнер көрсетті деп санайды.
Дүниежүзілік көшпенділер ойындарында Қазақстан құрамасы жартылай финалда Өзбекстанға есе жіберіп, финалға шыға алмай қалған еді. Осыдан кейін көкпардан Қырғызстан командасының бұрынғы басшысы Талас Бегалиев қазақ көкпаршылары қырғыздармен ойнауға қорқып, өзбектерден әдейі жеңіліп қалды деп мәлімдеген болатын. Қазақстан көкпар федерациясы көкпар төңірегіндегі шуға түсініктеме беріп, алып-қашпа әңгімеге сенбеуге шақырды.
"Мұның бәрі алып-қашпа әңгіме, шындыққа жанаспайды. Қазақ көкпаршылары өте жақсы ойнады. Жеңілді деп те айтуға болмайды, есеп айырмасы онша көп болған жоқ, 5:4. Ойын тікелей эфирде көрсетілді, жігіттер бар күшін салды. Команда құрамы — жастар. Біздің мақсатымыз жастарды осындай үлкен додаларда шығарып, шыңдап алу болды. Бұл енді турнир ғой, алда талай жарыстар бар. Биік белестерге жетеміз деп ойлаймын", — деді Оспанов.
Қазақстанның көкпар федерациясы Қырғызстанның ішкі істер органдарына Талас Бегалиев туралы айтқан.
"Осы жердің ішкі істер органдарына Талас Бегалиев деген адам келіп, ойыншыларды арандатты деп айттық. Қазір олар осы іспен айналысып жатыр… Қазақстанның құрама командасы отырған автобусқа кіріп, "намыстарың жоқ" деген сияқты ауыр сөздер айтқан. Екі елді араздастырмақ болған", — деді федерация президенті.
Оспановтың пікірінше, көкпар төңірегінде осыншама шу көтерудің ар жағында Қырғызстанның саяси күштері жатыр.
"Біздің мақсатымыз — екі елдің татулығы, көкпар ойынының өркендеуі. Лайық деңгейде өнер көрсеттік деп санаймын. Бұл жарыста көкпарға осыншама назар аударып, шу көтерудің ар жағында қырғыз елінің саяси күштері жатыр деп ойлаймын. Себебі бұл соншалықты байбалам салатын мәселе емес еді. Спорт бізді татуластыруы керек, біз тек сол мақсатта келіп отырмыз. Қырғыз бауырларымызды бір туған, ағайын деп санаймыз, ешқашан олармен араздаспаймыз", — деді ол.
Сондай-ақ, Ерлен Оспанов ақтық сындағы ойынға қатысты жеке пікірімен бөлісті.
"Финалда қырғыз көкпаршылары жеңеді деп ойлаймын. Өйткені, көшпенділер ойыны өз елдерінде өтіп жатыр, оның үстіне команда да мықты. Бірақ, бәрін ойын көрсетеді ғой", — дейді федерация президенті.
6200 рет оқылды
