29 мау, 2021 сағат 14:35

«Қалалар арасында блокпостар қойылды» – ақпарат жалған

Әлеуметтік желілерде елде енгізілген локдаун туралы ақпарат тарала бастады, деп хабарлайды "Ұлт ақпарат".

Ел тұрғандарының айтуынша, Қазақстан коронавирустың таралу қарқыны бойынша қайтадан «қызыл» аймаққа енді. Сол себепті қалалар арасындағы қозғалысқа тыйым салынған-мыс.

Бұл ақпаратты ҚР Денсаулық сақтау министрлігі Санитариялық-эпидемиялық бақылау комитеті жоққа шығарды.

«Бұл - жалған ақпарат. Бүгінгі таңда кейбір аймақтарда эпидемиологиялық жағдайдың нашарлауына байланысты карантиндік шаралар күшейтілді. Олар сауда орталықтарының, дәмханалардың, барлардың жұмыс уақытын қысқартуға, қоғамдық көліктерді дезинфекциялау уақытын ұлғайтуға және тағы басқасына қатысты.

Ел аумағында локдаун енгізілмейді. Қалалар арасындағы авиатасымал мен қалааралық жерүсті көлік қатынасы штаттық режимде жұмыс істейді. Блокпостар қойылмаған», – деп жазады stopfake.kz сайты ведомствоның ресми өкілі Ержан Байтанаевқа сілтеме жасап.

Бүгінгі таңда Қазақстанда Үндістанда алғаш рет табылған Delta-штамның таралуына байланысты КВИ-мен сырқаттанушылықтың өсуі тіркелуде.

Коронавирустың таралу қарқыны бойынша Нұр-Сұлтан, Алматы, Атырау, Батыс Қазақстан және Қарағанды облыстары «қызыл» аймаққа кірді. «Сары» аймақта – Шымкент, Ақмола, Ақтөбе, Қостанай және Маңғыстау облыстары тұр. Қалған өңірлер - «жасыл» аймақта.