Фото: Aa.com.tr
Ислам революциясы сақшылары корпусы «революция көшбасшысының шейіт болғанын» хабарлады. Fars агенттігі Хаменейдің таңертең жұмыс орнында өлтірілгенін жазды, деп хабарлайды Ult.kz.
Елде 40 күнге жалпыұлттық аза тұту жарияланып, жеті күн ресми демалыс берілді. Ислам революциясы сақшылары корпусы Иран қарулы күштері тарихындағы «ең қуатты шабуыл операциясын» жүргізуге уәде берді.
АҚШ президенті Дональд Трамп Хаменейдің өлімін «иран халқы үшін және иран режимі өлтірген барлық адамдар үшін әділдік» деп атады.
«Біз олардың Ислам революциясы сақшылары корпусының, армиясының және басқа да қауіпсіздік күштері мен полициясының көптеген өкілдері енді соғысқысы келмейтінін және бізден иммунитет іздеп жатқанын естіп отырмыз. Кеше кешке айтқанымдай: “Қазір олар иммунитет ала алады, ал кейін оларды тек өлім күтеді!”. Ислам революциясы сақшылары корпусы мен полиция ирандық патриоттармен бейбіт түрде бірігіп, ел лайықты ұлылықты қайта қалпына келтіру үшін біртұтас күш ретінде жұмыс істейді деп үміттенемін», — деп жазды Трамп Truth Social желісінде.
АҚШ президенті сондай-ақ жаппай бомбалаулар тағы бір аптаға немесе «Таяу Шығыста және түптің түбінде бүкіл әлемде бейбітшілікке қол жеткізу мақсатына жеткенге дейін қанша қажет болса, сонша уақытқа» жалғасатынын мәлімдеді.
Тегеранда сондай-ақ Әли Хаменейдің қызы, күйеу баласы, немересі және келіндерінің бірі қаза тапты.
Иранның жоғарғы жетекшісі Әли Хаменейдің төрт отбасы мүшесі — қызы, күйеу баласы, немересі және келіндерінің бірі — Израиль мен АҚШ соққылары салдарынан қаза тапты. Бұл туралы Ислам революциясы сақшылары корпусымен байланысты Fars агенттігі хабарлады.
CBS News мәліметінше, шамамен 40 ирандық шенеунік қаза болған.
Иран билігі 40 күндік аза тұту жариялады. Қайғы белгісі ретінде алдағы 7 күн жұмыс күні емес деп жарияланды.
