Германияда елдің батысындағы су тасқынына байланысты әскери апат режимі енгізілді, деп хабарлайды euronews.
Дүйсенбіден бері аймақта екі айлық жауынның мөлшері жауып, Рейннің екі саласы – Ар және Мозель және бірнеше кіші өзен арнасынан асты.
Әсіресе Солтүстік Рейн-Вестфалия және Рейнланд-Пфальц жерлері зардап шекті. Топырақтың шөгуіне байланысты кейбір үйлер құлады. Ал кейбір тұрғындар көтеріліп жатқан судан қашып, шатырда көмек күтуге мәжбүр болды. Өңірде құтқарушылар мен 900-ге жуық әскери қызметкерлер жұмыс істейді.
Су тасқыны салдарынан жүзден астам адамның өлімі расталды. Тағы мыңға жуығы хабар- ошарсыз кеткен. Билік олардың саны аз болуы мүмкін екенін айтады. Алайда жолдарды суу басып, ұялы желісінің болмауына байланысты көптеген адамдар зардап шеккен аудандарда тұратын туыстарымен хабарласа алмай отыр.
Германия президенті Франк-Вальтер Штайнмайер қайтыс болған жандардың отбасына көңіл айтып, қолдау білдірді. Сондай-ақ елдерді жаһандық жылыну мен климаттың өзгеруіне қарсы тұру үшін көп күш салуға шақырды.
Естеріңізге сала кетейік, осыған дейін Германиядағы су тасқынынан құрбан болғандар саны 59 адамға жеткені және жүздеген адамның хабар-ошарсыз кеткені хабарланған болатын.
968 рет оқылды
