02 жел, 2019 сағат 05:58

Германияда Штази музейіне ұры түсті

Берлинде бұрынғы коммунистік Шығыс Германияның қауіпсіздік қызметі - Штази тарихы туралы музейді белгісіз біреулер тонап кеткен. Бұдан бірнеше күн бұрын Дрездендегі музейге түскен ұрылар ондағы бағалы зергерлік бұйымдарды алып кеткен еді.

Берлин полициясының хабарлауынша, Штази музейіне ұрылар 30 қараша күні кешке немесе түн мезгілінде түскен. "Олар әйнекті сындырып, музейде тұрған медальдар мен бағалы заттарды алып кеткен" дейді полиция. Ұры түскенін 1 желтоқсанда таңертең бір-ақ білген музей қызметкерлері полицияға хабарлаған.

25 қарашада Дрездендегі бұрынғы Саксония билеушілерінің сарайындағы электр желісін ішінара ағытып тастаған ұрылар музейден 18 ғасырдың бағалы заттарын алып кеткен. Қолды болған құнды жәдігерлер арасында Саксония королі Августың әйгілі 49 каратты гауһар тасы да бар.