Елорданы газдандыру ауаға таралатын зиянды шығарындыларды 40 мың тоннаға қысқартуға мүмкіндік береді. Бұл туралы «Астана» телеарнасына сұхбат берген елорда әкімі Алтай Көлгінов айтты, деп хабарлайды ҚазАқпарат.
«Өздеріңіз де білетіндей, газдандыру - бұл тарихи сәт, өте маңызды жоба. Елбасы мұны осыдан бірнеше жыл бұрын жария еткен болатын. Енді міне, магистралды газ құбыры салынды. Президент бұл мәселені жеке бақылауында ұстап отыр. Елорданы дамыту жөніндегі кеңесте Мемлекет басшысы бұл жұмысты сапалы жүргізуді тапсырған болатын. Өткен жыл күрделі болды. Өйткені, сотпен байланысты айтыс-тартыс болды. Ал қазір кестені қуып жеттік және тарату желілері салынып жатыр. ЖЭС-1 мен ЖЭС-2-ні жаңа жылу беру маусымында, күзде іске қосуға тиіспіз. Бұл бағытта қазір қарқынды жұмыс істеп жатырмыз», - деді Алтай Көлгінов.
Қала басшысының айтуынша, кестеге сәйкес жеке секторлардың ішінде ең алдымен Көктал-1 және Көктал-2 тұрғын үй алабындағы тұрғындарға көгілдір отын жеткізіледі.
«Қазіргі уақытта ауылдың ішіне кірдік және жазда алғашқы әлеуметтік нысандарға газ қосуды жоспарлап отырмыз. Олар: мектептер, қарттар үйі, әлеуметтік нысандар. Одан кейін Железнодорожный елді мекеніне газ тартылады. Осы ретте неліктен жеке сектордан бастағымыз келіп отырғандығын түсіндіре кетейін. Бірінші кезекте, бізге экологияны жақсарту қажет. Желсіз ауа райы кезінде, барлығы пеш жаққанда бүкіл жеке секторды түтін басып кетеді», - деді елорда әкімі.
Оның атап өтуінше, елорда экологиясын жылу электр стансалары, жеке тұрғын үйлерде қыста жағылатын отын және автомобильдер бұзып отыр.
«Карантин ауаның тазара түскендігін көрсетті. Ботаникалық бақта аққулар пайда болды. Бұрын болған емес еді. Министрлер үйінің жанында қояндар жүр. Мұның барлығы табиғаттың қалай жанданғанын көрсетіп отыр. Міне осыдан қорытынды шығаруымыз керек», - деді ол.
Алтай Көлгіновтің дерегінше, елорда газдандыру ауаға таралатын зиянды шығарындыларды 40 мың тоннаға қысқартуға мүмкіндік береді.
1027 рет оқылды
