Alibaba негізін қалаушы Джек Ма қоғамдық өмірге оралды, кәсіпкер компанияның штаб-пәтеріне барды, - деп хабарлайды Tengrinews Reuters агенттігіне сілтеме жасап.
Джек Ма Ханчжоудағы Alibaba Group кампусының бірінде болған. Қытайдың ірі компанияларының бірінің негізін қалаушы әріптестерімен бірге жыл сайынғы "Ali күні" (Ali Day) іс-шарасына қатысуды шешіпті.
Қызметкерлер түсірген фотосуреттер мен бейнежазбаларға сәйкес, Джек Ма бұл іс-шараға Alibaba компаниясының басқа басшыларымен бірге қатысқан. Директорлар кеңесінің төрағасы қызметінен кетсе де, Ма компанияда әлі де беделді екені атап өтіледі.
Джек Ма былтыр күзде Қытай үкіметін сынағаннан кейін қоғамдық қызметін тоқтатқан еді. Содан кейін ҚХР билігі Alibaba Group-қа қатысты монополияға қарсы тергеу бастап, компания акцияларын сатуға тыйым салған. Осылайша, тек бір күнде ол 3,5 миллиардтан аса доллардан және Азиядағы ең бай адам атағынан.
Осыдан кейін миллиардер көпшілік алдына тек онлайн шыққан. Қаңтарда ол ауыл мұғалімдерін қолдауға арналған онлайн-шараға қатысқан. Сәуірдің ортасында Ма Ресей географиялық қоғамы қамқоршылар кеңесінің бейнеконференциясында болған.
Бұған дейін Қытай Alibaba компаниясына медиаактивтерінен құтылуды талап етіп, компанияға тарихтағы ең үлкен айыппұл салғаны хабарланған болатын. Сонымен қатар, ел билігі Джек Ма бизнес мектебін студенттерді қабылдауды тоқтатуға мәжбүр етіп, компаниясының өкілдері және кәсіпкердің өзімен келіссөз жүргізген. Кездесулерде Джек Маның компаниядан кетуі және үлесін сату мәселесі талқыланған еді.
696 рет оқылды
