Актер әрі режиссер, Қазақстанның халық әртісі Досхан Жолжақсынов Дүниежүзілік «Қазақ күресі» федерациясының «Құрметті президенті» болып сайланды, – деп хабарлайды «Ұлт ақпарат».
Алыс-жақын шет елдердің өкілдерінің қатысуымен елордада Дүниежүзілік «Қазақ күресі» федерациясының халықаралық конгресі өтіп жатыр. Жиын барысында федерация президенті Алик Шпекбаев әлемнің 27 елінен келген федерация мүшелеріне ұсыныс білдірді. Ол бойынша федерацияның «Құрметті президенті» ретінде Досхан Жолжақсыновты, бірінші вице-президенті ретінде Бәделхан Камалханұлын сайлау ұсынылды. Көпшілік бір ауыздан қолдады.
Жиынның күн тәртібінде федерация алқа мүшелерінің сайлануымен қатар, басқа да мәселелер қарастырылмақ.
Айта кетерлігі, 2019 жылдың 20-21 желтоқсан аралығында Нұр-Сұлтанда қазақ күресінен VIII Әлем біріншілігі өткізіледі. Оған 40-қа тарта мемлекеттен 300-ге жуық спортшы (ерлер мен әйелдер) қатысады. «Дәулет» спорт кешенінде өтетін байрақты бәсеке барысында ерлер (6 салмақ) мен әйелдер (6 салмақ) арасында 12 салмақ дәрежесінде жүлделер сарапқа салынбақ. Әлем біріншілігінің салтанатты ашылуы жоғарыда аталған спорт кешенде 20-шы желтоқсан күні сағат 16.00-ге жоспарланған. Аталған Әлем чемпионаты Біріккен Күрес Әлемінің (United World Wrestling) 2019 жылға арналған ресми күнтізбесіне енген және жарыстар толықтай UWW ресми өкілдері мен халықаралық дәрежедегі төрешілерінің қатысуымен өткізілмек. Ел жанкүйерлері «Qazsport» телеарнасы арқылы додалы жарыстың белдесулерін тамашалай алады.
Жарысты ұйымдастырушылар – Біріккен Күрес Әлемі, Нұр-Сұлтан қаласының әкімдігі, Дүниежүзілік «Қазақ күресі» федерациясы. Әлем чемпионаты «Eurasian Resources Group» (ERG) қолдауымен өткізілмек.
1649 рет оқылды
