09 қаз, 2021 сағат 17:27

Димаштың жетістігін қайталаған әнші "Дауыс" жобасында жұртты таңғалдырды - видео

2019 жылы "Славян базары" байқауында гран-при иегері атанып, Димаш Құдайбергеннің жетістігін қайталаған қазақстандық әнші Әділхан Макин "Ресей дауысы" жобасында қазылар алқасы мен көрермендерді таңғалдырды, деп хабарлайды Sputnik Қазақстан.

27 жастағы Әділхан байқауда Алла Пугачеваның "Не отрекаются любя" әнін орындады. Оның өнеріне тәнті болған қазылар алқасының екі мүшесі – Александр Градский мен Дима Билан бұрылды.

"Мен Димаштан кейін ештеңеге таңғалмайтын болдым. Ал бүгін сен мені таңғалдырдың. Жоғарғы регистрде тенор, орта регистрде баритон, төменгі регистрде төменгі бас секілді шырқайсың. Бұл өте сирек кездесетін жағдай", - деп атап өтті Градский.

Отандасымыз байқаудағы тәлімгері ретінде Александр Градскийді таңдады.

Айта кетейік, Әділхан Макин - 1994 жылдың 5 қазанында Петропавл қаласында туған. Оның музыкалық таланты бала күнінен байқала бастайды. Т. Жүргенов атындағы Қазақ ұлттық өнер академиясында "Эстрадалық вокал" мамандығы бойынша білім алды.

Әнші Болгарияда поп-рок орындаушылар арасында өткен "Сарандев 2019" халықаралық жастар байқауында бірінші орын иеленген. Бұдан бөлек, 2018 жылы X Factor тележобасына қатысып, финалға дейін жетті.

Әділхан – Димаш Құдайбергеннен кейін "Славян базары" халықаралық байқауында жеңіске жеткен екінші қазақстандық. 2015 жылы Димаш бас жүлдені иеленіп, қазақ елінің мерейін асырған еді.

Димаш пен Әділхан құрдас, алғаш 2012 жылы "Жас қанат" байқауында танысқан. Сол жылы байқауда Димаш жеңімпаз атанды.