Фото: kawa-news.com
Бүгін – Қадір түні. Бұл – берекелі Рамазан айында келетін қасиетті түн. Рамазан айының соңғы он түні мұсылман үшін өте маңызды. Себебі Қадір түнінде қасиетті Құран Кәрім түсе бастады. Сондықтан Ислам дінінде бұл түн ерекше бағаланады, деп хабарлайды Ult.kz.
«Қадір» – араб сөзі. Тілдік мағынасы қадірлі, қасиетті, өлшеммен бекітілген, артық-кемі жоқ, дұрыс деген мағыналарға саяды. Ал шариғи терминдік мағынасына «бір жылда болатын істерді белгілеп, соның жазылуына Алла Тағаланың үкім беретін түні» деп анықтама берілген. Құран Кәрімде «Қадір» сүресі бар. Осының өзі-ақ бұл түннің аса ардақты екенінен хабар береді.
Осы түннің ерекшеліктері мен өткізу амалдары туралы ҚМДБ төрағасының орынбасары, наиб мүфти Сансызбай Құрбанұлы мен уағыз-насихат бөлімінің меңгерушісі Батыржан Берденұлы тарқатып айтып берді.
Фото: muftyat.kz
Сансызбай ұстаз Құрбанұлы:
«Күннің абзалы жұма десек, түннің абзалы осы – Қадір. Қадір түні немен қадірлі болды, оны кім қадірлі қылды? Алла Тағала оны қадірлі қылды. Өйткені бұл мақұлұқ болмаған, жаратылмаған Құран Кәрім, бұл аспан есігі ашылып, бұл адамзатқа тура жолды нұсқау, хидаят, қуаныш келтірген Құран Кәрімнің түскен түні. Рамазан айы – Құран түсілірген ай. Қадір түнінің сауабы өте көп. Жер бетіне қанша тас, қанша құм болса сонша періштелер жер бетіне түседі».
Батыржан ұстаз Берденұлы:
«Алла Тағала пенделеріне күндерді, түндерді беріп қойды. Сондай түндердің дұғасы қабыл болатын мерзімді жасырып қойды. Өйткені пенде соны іздесін, пенде соған ұмтылсын, адам баласы соған әрекет қылсын деп. Жалпы адам баласы ашық жатқан нәрсеге қарай бермейді ғой. Жабық тұрған нәрсеге барып, ішінде не бар екен деп қызығып қарайды. Қасиетті жұма күнін алайықшы, жұма күнінде сондай бір сағат бар, сол уақытта пенденің дұғасы қабыл болатын уақыт деді. Бірақ біз құптанның кезі ме, намаздан кейін бе, намаздан бұрын ба, таңертең бе, кешке ме білмейміз. Бірақ біз дұға жасап, сол күннің қасиетін Алладан сұраймыз. Міне, Алланың хикметі бұл түнді де жасырып қойды. Яғни деректер бар, хадистер бар, қарап отырсақ, бұл соңғы 10 күннің тақ түндерінен іздейміз».
Қадір түні – күллі мұсылманның 83 жылдық сауаптан үміт етіп, Алла Тағаланың разылығын іздеп мешітке келетін ерекше уақыт. Барлық мешітте Құран хатым дұғасы жасалып, жамағат таңсәріге дейін құлшылық қылатын айрықша сәт.
Осы орайда ел арасында көп талқыланатын «Бұл түнді қалай өткізген дұрыс? Мешітке бару шарт па?» деген сауалдың да жауабын іздеп көрдік.
Сансызбай ұстаз Құрбанұлы:
«Әрине, мешітке барғаны жақсы. Бірақ бұл шарт, уәжіп деп айта алмаймыз. Осы күні қандай құлшылық жасайды, құран оқи ма, дұға оқи ма, жоқ әлде діни кітап оқи ма, қандай болсын бәрі де қабыл болады».
Фото: muftyat.kz
Батыржан ұстаз Берденұлы:
«Қадір түніне адам баласы бірінші рухани дайындалу керек. Рухани дайындық неден басталады? Адам баласы алдымен жүрегін тазалаудан бастау керек. Жүрек немен тазаланады? Жүрек ниетпен тазаланады. Қадір түніне жақсылап ықылас қойып, ниетін жаңарту керек. Одан кейін оның жүрегінен дұға шығады. Деректерде мысалы, Айша анамыз (Алла Тағала ол кісіге разы болсын) Пайғамбарымызға (с.с.а) «сол күнге жетсем, Қадір түні екенін білсем, не деп дұға жасайын?» дегенде, қысқа ғана мәтін көрсеткен. «О, Жаратқан Алла, сен мейірімдісің, сен кешірімдісің, кешіргенді жақсы көресің. Мені кешіре көр, жарылқай көр». Бұл қысқа ғана дұғаның ішінде барлығы бар. Бірінші Алланың кеңшілігі бар. Яғни сол күні кім алақанын жайып Алладан сұрайды, Алла Тағала сол пендесін кешіремін деп тұр. Өйткенің Алла кешіргенді жақсы көреді.
Қадір түні – тағдыр түні. Қадір түні саған берілген мүмкіндік. Сондықтан жүрекпен бұл түні біз ішіміздегі барлық қалауымызды Алладан сұрауымыз керек. Өзімізге, отбасымызға, бала-шағамызға, елімізге, отанымызға, ата-анамызға, бұрынғы өткен ата-бабаларымызға, марқұм болғандарға да, тіршіліктегі адамдарға да дұға жасай аламыз. Мұсылманның ең үлкен қорғаны – дұғасы».
Ғалымдар бұл түннің атауына байланысты бірнеше себеп келтірген. Біріншіден, Қадір түні – шәраф, яғни қадірлі, шарапатты, абыройлы түн. Екіншіден, Қадір тағдыр мағынасында келеді, яғни осы түні бір жылда болатын оқиғалар мен болмыстың тағдыры, ризық-несібесі мен ажалы жазылады. Үшіншіден, Қадір сөзі құрметті, қасиетті деген мағынаға саяды. Қадір түнін ұйықтамай, құлшылықпен өткізген кісі Алла Тағаланың құзырында құрметке бөленеді дейді.
764 рет оқылды
