Қазақстандық кәсіпқой боксшы Жәнібек Әлімханұлының келесі қарсыласы анықталды. Бұл туралы спортшы өзінің желідегі парақшасында жазды, деп хабарлайды "Ұлт ақпарат".
Жәнібек Әлімханұлының кезекті жекпе-жегі 9 қазан күні Лас-Вегастегі MGM Grand аренасында аргентиналық Гонсало Корияға қарсы өтеді.
Айта кетейік, Ж.Әлімханұлы танымал тәлімгер Джеймс «Бадди» Макгирттің жетекшілігімен Калифорнияда жаттығады.
Қазақстандық спортшының 28 наурызға жоспарланған кезекті жекпе-жегі кейінге қалып, өтпей қалған еді.
«Өкінішке орай 28 наурызда Канадада өтетін жекпе-жек кейінге қалды. Коронавирустың салқыны біздің жекпе-жекке де тиді. Үш ай қан мен тер шығарып, қызу дайындалып, жақсы формаға кіріп едік. Мықты спаррингтер жасап, QAZAQ STYLE-ды шыңдап, шоу көрсетуге дайын болғанбыз. Бірақ Топ ренк (Top Rank Promotions компаниясы) спортшылардың денсаулығы маңызды деп шешті. Біздің ғана емес наурыз бен сәуірде өтетін бүкіл жекпе-жектер тоқтатылды», - деді Жәнібек Әлімханұлы.
974 рет оқылды
