14 қыр, 2022 сағат 13:30

Алматыда Qozgan inc. қаржы пирамидасы анықталды

Алматы қаласында тағы бір қаржы пирамидасы анықталды. Бұл туралы Қаржылық мониторинг агенттігінен мәлімдеді, - деп хабарлайды "Ұлт ақпарат".

ҚМА Алматы қаласы бойынша департаменті Qozgan inc. ЖШС қаржы пирамидасының қызметіне тосқауыл қойды. ЖШС инвестициялық компания атын жамылып, Қазақстан Республикасының тендер алаңында мемлекеттік және жеке сатып алуларға қатысып келген.

"Ұйымдастырушылар сенгіш азаматтарға 105 күн ішінде салым сомасының сыйақысы 5-тен 30 пайызға дейін болатындай, ақшалай қаражатты тендерлік жобаларға салуды ұсынған.

Салымшылардың жалпы саны 100-ден асады. Қаржы пирамидасының қызметінен келген шығын анықталып жатыр.

Қазіргі уақытта Qozgan Inc. компаниясының екі ұйымдастырушысына қатысты соталды тергеу амалдары жүргізіліп, 2 айға дейін "қамау" түріндегі бұлтартпау шарасы санкцияланды.

ҚР ҚМА азаматтарды қырағы болуға және жинақтарын күмәнді қаржы институттарына салмауға шақырады", - делінген хабарламада.