Барлық алматылықты ПТР әдісі арқылы тексеру мүмкін емес. Бұл туралы Алматы қалалық Қоғамдық денсаулық сақтау басқармасының бастығы Тілеухан Әбілдаев мәлім етті, деп хабарлайды "Ұлт ақпарат".
«Бүгінгі таңда қалада бір тәулікте 3 мың ПТР тест жасалады. Оны 4 мыңға жеткізуді көздеп отырмыз. Бірақ екі миллион халықты ПТР әдісі арқылы тексеру мүмкін емес. Оны жүзеге асыра алмаймыз», - деді Тілеухан Әбілдаев Алматыдағы Қоғамдық кеңестің онлайн отырысында.
Сонымен қатар, ол қалада оңтүстіккореялық жылжымалы мобильді скринингтік орталықтың ашылғандығын атап өтті. Онда алматылықтар ақысын төлеп ПТР тест тапсыра алады. Сондай-ақ мұндай қызметті «Олимп» медициналық орталығы да көрсетеді.
Өз кезегінде Алматы қаласының мемлекеттік бас санитарлық дәрігері Жандарбек Бекшин мегополисте 88 мың тест жасалғанын айтты.
«Біз бәріне 100% ПТР диагностикасын ұсына алмаймыз. Бүгінгі таңда 88 мың тест жүргіздік. Бізде тест жеткіліксіз. Халықты жүз пайыз тестілеуге мүмкіндік жоқ. Әлемнің бірде-бір экономикасы мұны көтер алмайды. Алайда адамдарды тексеру жағынан біз қазір әлемнің жетекші тобына кіреміз, өйткені әкімдік бұған мүмкіндік берді», - деді ол.
1260 рет оқылды
