Фото: Ult.kz
Алматыдағы «ÓzgeEpic» креатив хабында «Ауыл мектебі» фотокөрмесі ашылды. Бұл – еліміздегі ауыл мектептеріне арналған алғашқы көрме, – деп хабарлайды Ult.kz.
Фотокөрме өңірлердегі білім ошақтарының жаңа технологияларды игеруін, бәсекеге ұмтылысын, елдімекеннің дамуына тигізген әсері мен жергілікті тұрғындардың болмысы мен күнделікті тіршілігін айшықтайды.
Шалғайдағы өркениет
Фотокөрме «ÓzgeEpic» креатив хабының бастамасымен және ұйымдастыруымен және Білім беру саласын тұрақты дамыту қоры қолдауымен жүзеге асқан. Жоба кураторы Тоғжан Құрманжанқызының айтуынша, бір қарағанда фотосуретте ешқандай айырмашылығы жоқ болуы мүмкін. Бірақ бұл білім ошақтарының жаңа технологиярды игеруін, бәсекеге ұмтылысын, елдімекеннің дамуына тигізген әсері мен жергілікті тұрғындардың болмысы мен күнделікті тіршілігін айқындайтын көрме.
Фото: Ult.kz
«ÓzgeEpic» креатив хабы 2019 жылдан бері жұмыс істейді. Осы жылдан бастап мәдениеттің барлық саласы бойынша, театр, әдебиет, музыка, көркемөнер, көркемсурет, барлық сала бойынша жұмыс істейміз. Музыкадағы жаңа бағыттар бойынша осында концерттер өткіземіз. Көрмеден өздеріңіз көріп тұрған мектеп Жамбыл облысындағы Жуалы ауданындағы Әлихан Бөкейханов атындағы мектебі. Бір қарағанда қаланың мектептерінен ешқандай айырмашылығы жоқ. Бірақ бұл шалғай ауылдағы, өркениеттен кішкене алыс жатыр. Бірақ барлық адам сол мектепке бара бергісі келеді. Өйткені ол жерде жаңа технология бар. Ол жерде интернет бар, ол жерде әлеммен байланыс бар. Осындай мектептерді елге таныстыру үшін шығармашылық топ құрдық, ол топқа белгілі фотографтар Айгерім Бегімбет мен Сәбина Әбдіхалықты алдық. Біз бір ай шамасында осы Ә.Бөкейханов атындағы мектепке барып, мектепті әбден зерттедік. Таңертең балалармен бірге кіреміз, кешке балалармен бірге шығамыз. Мұғалімдермен, оқушылармен әңгімелесеміз. Өте қызық оқиғалар бар. Мына мектепте оқып жатқан балалар қаланың мектептерінен айырмашылығы жоқ. Олар тең дәрежеде ағылшын тілінде сөйлейді, технологиялық мүмкіндіктердің бәрі жасақталған. Барлық бала ғалым болғысы келеді. Армандары ауылмен байланысты. Біздің көрмеден ұққанымыз, біздің ең үлкен құндылығымыз сол деп ойлаймын. Балалардың бәрі елге қызмет еткісі келеді, ауылды көркейткісі келеді. Көрмедегі әрбір кейіпкердің артында үлкен оқиғалар бар», – деді Тоғжан Құрманжанқызы.
Медицинадан спортқа ауысқан жан
Осылайша, көрмеде әр кейіпкердің артында үлкен оқиға барын фотограф Айгерім Бегімбет әңгімелеп берді. Ол өз сөзінде осы мектептерде өзіне ұнаған екі кейіпкерді ерекше таныстыруды жөн көрді.
Фото: Ult.kz
«Бірінші кейіпкерім Оразымбетова Шынар апай, бұл кісі бастауыш сынып балаларына дене шынықтырудан сабақ береді. Шынар апай бала кезінен спортқа жақын болып өскен, әртүрлі спортпен айналысқан. Мектеп бітіргеннен кейін де сол спорт саласына барғысы келген. Бірақ ауылдағы ата-анасы ертең сен тұрмысқа шығасың, сен барған жеріңе жұмыс табылмайды, қыз баласына лайық жұмыс таңда деп, бұл кісіні дәрігерлік оқуға түсіреді. Содан кейін бұл кісі ұзақ жылдар бойы медбике, фармацевт, лабораториялық жұмыстар атқарады да, жасы 40-тан асқаннан кейін ойлана бастайды. Менің бүкіл өмірім өз армандарымнан алыс өтті ме, менің бала кездегі армандарым мен мақсаттарым қайда, мен өз қалауымды жасап жүрмін бе деп ойланады. Содан кейін бәрін тастап, 42 жасында Тараздағы университетке дене шынықтыру факультетіне оқуға түседі. 46 қолына диплом алып, осы мектепке жұмысқа барған. Бүгінде 10 жылдан бері балаларға дене шынықтырудан сабақ береді. Бір қызығы, Түркістандағы осы «Ауыл мектебі» көрмесінің ашылуына осы мектептен бір топ мұғалім келді. Ішінде Шынар апай да бар. Мен осылай апайдың өмірбаянын айтып жатсам, қасында бірде-бір әріптесі ол кісінің арманына сондай жолмен келгенін білмейді екен. «Шынар апай бізге осынша уақыт бойы бұл оқиғаңызды айтпағансыз, біз неге білмегенбіз» дегенде, апай күліп әріптестері де осындай көпшіліктің алдында осындай үлкен деңгейде білгенін қалағанын айтты», – деді Айгерім Бегімбет.
Ауыл балаларына кітап тасыған кітапханашы
Фотографтың екінші кейіпкері Еркегүл деген капай, жалпы еңбек өтілі 30 жылға жуық кітапханашы болып істеген. Жамбыл облысы, Жуалы ауданы, Б.Момышұлы ауылы Әлихан Бөкейхан атындағы №15 тірек мектеп-лицейі ашылғанына 10 жыл, бұл апай он жылдан бері кітапханашы.
Фото: Ult.kz
«Еркегүл апай он жыл бұрын мектепке кітапханашы болып келгенде кітап қоры өте аз болған. Сосын Еркегүл апай мектептегі балалар оқысын деп, аудандық кітапханадан және жанындағы Қайрат деген ауылдың кітапханасынан өз атына кітаптар жаздырып алып, ауылдың балаларына кітап тасыған. Сөйтіп балаларды оқытқан. Әрине, бүгінде мектептің кітап қоры үлкейді. Қазір мектепте 41 мыңнан астам кітап қоры бар. Оның үш мыңы әдеби оқулықтар. Біз барған кезде отандық баспалардың соңғы шыққан кітаптары тұрды, мен көріп қуандым. Апайдың маған қуана бөліскен жаңалығы, сол кезіндегі кітап тасып беріп оқытқан балалары қазір мектепке амандасуға, сәлем беруге барғанда сыйлыққа міндетті түрде әдеби кітаптар алып барады екен», – деді Айгерім Бегімбет.
Фото: Ult.kz
Шығармашылық топтың тағы бір мүшесі, фотограф Сәбина Әбдіхалық қазіргі балаларға барлық жағдай жасалғанын қуана айта келе, жоба ұйымдастырушыларға да алғысын білдірді.
«Мен фото саласына хобби ретінде келгенмін. Қазір деректі форматқа көшіп жатырмын. Осы жобада, ауылдарда процесстің өзі қызық болды. Әр ауылдың адамдарымен араласып, суретке түсіріп, етене жақын болып кеттік. Өзім де шағын ауылда өстім, шағын 9 жылдық мектепте оқыдым. Бірақ мектеп бітіретін кезде бізге жаңа мектеп салып берді. Осындай жаңа техника бар, бірақ бізге ешқайсысын қолдандырмайтын. «Бас, қос, өшір» деп, басқа ештеңесін пайдаландырмайтын. Қазір мен қуанып тұрмын, барлық балалар жаңа, заманауи технологияларды емін-еркін қолданып жүр. Ғылымға ерте бастан бет бұрады. Мүмкіндігі зор. Осындай жағдайды жасап беріп, осындай жобаларды атқарып жүрген, бізге де соның бір мүшесі болып атсалысуымызға мүмкіндік берген ел ағаларына, жоба жетешкілеріне алғысым шексіз», – деді Сәбина Әбдіхалық.
Фото: Ult.kz
Білім беру саласын тұрақты дамыту қоры туралы
Айта кетейік, аталмыш жобаны қолдаушы – Білім беру саласын тұрақты дамыту қоры. Қордың тарихы 2019 жылы кәсіпкер Серік Толықпаевтың бастамасымен ауылдық аумақтарды тұрақты дамыту қоры құрылған кезде басталады. Ол ауылдағы өмірді жақсарту мақсатында елдің бей-жай қарамайтын азаматтарын жинаған. Ал бірінші өңір кәсіпкердің туған жері Катонқарағай ауданы болды. Қордың тарихы 2019 жылы кәсіпкер Серік Толықпаевтың бастамасымен Ауылдық аймақтарды тұрақты дамыту қоры құрылған кезде басталады. Ауыл өмірін жақсартуды мақсат тұтқан, ел қамын ойлаған азаматтарды жинады. Ал бірінші аймақ кәсіпкердің туған жері Катонқарағай ауданы болды.
2019 жылы Ауылдық аймақтарды тұрақты дамыту қоры мен Назарбаев Зияткерлік мектептері «Powered by NIS ауылдық мектептері» жобасын іске қосты. Жоба ауылдық және қалалық мектептер арасындағы білім беру сапасындағы алшақтықты азайтуға бағытталған. Қордың тарихы 2019 жылы кәсіпкер Серік Толықпаевтың бастамасымен Ауылдық аймақтарды тұрақты дамыту қоры құрылған кезде басталады. Ауыл өмірін жақсартуды мақсат тұтқан, ел қамын ойлаған азаматтарды жинады. Ал бірінші аймақ кәсіпкердің туған жері Катонқарағай ауданы болды. 2019 жылы Ауылдық аймақтарды тұрақты дамыту қоры мен Назарбаев Зияткерлік мектептері «Powered by NIS ауылдық мектептері» жобасын іске қосқан. Жоба ауылдық және қалалық мектептер арасындағы білім беру сапасындағы алшақтықты азайтуға бағытталған.
Ал 2022 жылғы 14 шілдеде «Қазақстан халқына» қоры, Білім беру саласын тұрақты дамыту қоры және «Назарбаев Зияткерлік мектептері» АҚ арасында ынтымақтастық туралы Меморандумға қол қойылды, оның шеңберінде «Ауылдық жерлерде тірек мектептердің әлеуетін дамыту» қайырымдылық жобасына 4.25 млрд теңге көлемінде грант бөлінген.
Ақбота Мұсабекқызы
1424 рет оқылды
