Мемлекеттік комиссияның шұғыл штабы Ақтөбе облысында коронавирус инфекциясын жұқтырған 7 адам туралы толық мәлімет берді, деп хабарлайды "Ұлт ақпарат".
Олардың үшеуі, 42 жастағы әйел адам және 39, 37 жастағы ер азаматтар — Ақтөбе облысының тұрғындары. Карантиндік стационарға жатқызылған. Олардың бәрі 22 сәуір күні «Жайсаң» санитарлық-карантиндік бекеті арқылы РФ Мәскеу қаласынан келген.
Атырау қаласынан автокөлікпен келген 36 жастағы әйел адам карантиндік стационарға жатқызылды.
Сондай-ақ, 45, 37 және 36 жастағы ер адамдар Орынбор қаласы арқылы Ресейден келген. Олар — Түркістан облысының азаматтары.
«Жайсаң» санитарлық-карантиндік бекетінде олармен сауалнама жүргізіліп, байланыссыз термометрия жасалды.
ПТР диагностикалық зерттеу қорытындысы COVID-19 диагнозын нақтылады.
Қазіргі таңда олар облыстық жұқпалы аурулар ауруханасына орналастырылды. Жағдайлары қанағаттанарлық.
Азаматтармен қарым-қатынаста болған адамдар анықталып, барлығы медициналық бақылауға алынды.
Ауру ошақтарында эпидемиологиялық зерттеу, дезинфекциялық жұмыстар жүргізілді.
23 сәуірдегі жағдай бойынша облыста COVID-19 коронавирус инфекциясын жұқтырған 34 адам анықталды.
839 рет оқылды
