Jyl basynan beri kópbalaly otbasylar 261,7 mlrd teńgege járdemaqy aldy, dep habarlaidy QazAqparat.
«2021 jylǵy qańtardan bastap qarashany qosa alǵandaǵy aralyqta kópbalaly otbasylarǵa beriletin memlekettik járdemaqy tólemderimen jalpy somasy 261,7 mlrd teńgege orta eseppen 446,4 myń otbasy qamtyldy. Sonyń ishinde qarashada járdemaqynyń bul túrin 471,4 myń otbasy jalpy somasy 26,6 mlrd teńgege aldy. Atalǵan memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deiingi kúndizgi bólimde oqityn stýdent balalary bar otbasylar tabysyna qaramastan úmitker bola alady», - delingen Eńbek ministrligi málimetinde.
Tólem mólsheri balalardyń sanyna bailanysty saralanyp tólenedi jáne 2021 jyly 46 760 teńgeni (4 bala), 58 457 teńgeni (5 bala), 70 154 (6 bala) teńgeni, 81 852 teńgeni (7 bala), 8 balaǵa – 93 344 teńgeni, 9 balaǵa – 105 012 teńgeni, 10 balaǵa – 116 680 teńgeni, 11 balaǵa – 128 348 teńgeni, 12 balaǵa – 140 016 teńgeni, 13 balaǵa – 151 684 teńgeni, 14 balaǵa – 163 352 teńgeni, 15 balaǵa – 175 020 teńgeni, 16 balaǵa – 186 688 teńgeni nemese ár balaǵa 11 668 teńgeni quraidy.
Eske sala keteiik, kópbalaly otbasylarǵa olardyń kiristerin esepke almai beriletin jańa memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń úsh negizgi baǵyty aiasynda engizilgen bolatyn.
