Jyl basynan beri 400-ge jýyq shalǵai aýyl talshyqty-optikalyq bailanys jelisi tehnologiiasy boiynsha joǵary jyldamdyqty internetke qosyldy. Bul týraly QR Tsifrlyq damý, innovatsiialar jáne aeroǵarysh ónerkásibi ministrliginiń baspasóz qyzmetinen málim etti, dep habarlaidy "Ult aqparat".
«2020 jyldyń basynan beri 393 aýylǵa talshyqty-optikalyq bailanys jelisi salyndy. Bul aýyldyq eldi mekenderdi joǵary sapaly internetpen qamtamasyz etý jónindegi aýqymdy jobany iske asyrýdyń nátijesinde múmkin boldy. Bul joba 2018 jyldan bastap memlekettik-jeke menshik áriptestik qaǵidaty boiynsha iske asyrylýda. QR Tsifrlyq damý, innovatsiialar jáne aeroǵarysh ónerkásibi ministrliginiń bul jobadaǵy seriktesteri, elimizdiń iri bailanys operatorlary: «Qazaqtelekom» AQ, sondai-aq quramyna «Transtelekom» AQ men «SilckNetCom» JShS engen konsortsiým» dep atap ótedi ministrlikten.
Vedomstvo málimetinshe, 2020 jyldyń sońyna deiin bailanys operatorlary óz qarajaty esebinen 20 myń shaqyrymnan astam talshyqty-optikalyq bailanys jelilerin salyp, 1250 shalǵai aýyldaǵy mektep, aýrýhana men ákimdikke keń jolaqty Internet jelisine qosylý múmkindigin usynady. «Optikalyq - talshyqty» joba iske asyrylǵaly beri 2065 aýrýhana, mektep, shuǵyl áreket etý qyzmeti, ákimdik jáne taǵy basqalary jumys isteitin 706 aýylǵa jeli júrgizildi.
Sonymen qatar, aýyldarda talshyqty-optikalyq jeliler bolǵan jaǵdaida uialy bailanys operatorlaryna ózderiniń bazalyq stansalaryn ornatýǵa jáne aýyl turǵyndaryn sapaly mobildi internetpen qamtamasyz etý múmkin bolmaq.
Elimizde iske asyrylyp jatqan ekinshi joba aiasynda uialy bailanys operatorlary 2020 jyldyń sońyna deiin 250-den astam adam turatyn barlyq aýylǵa mobildi Internetti júrgizýge mindetteldi. Bul rette TOBJ jobasyn júzege asyrý nátijesinde qurylǵan infraqurylymdy uialy operatorlar 3G/4G tehnologiialaryn qoldaný úshin belsendi paidalanbaq.
«Osylaisha 2020 jyldyń sońyna qarai joǵary jyldamdyqty internetpen qamtamasyz etilgen eldi mekender sany 5 163 jetedi. Bul eldi mekenderde turyp jatqan halyq sany el halqynyń 99,3 paiyzyna teń» delingen ministrlik aqparatynda.
