Kókshetaý qalasy mańyndaǵy dalada qurǵaq shóp órtendi, dep habarlaidy QazAqparat tilshisi Aqmola oblystyq TJD baspasóz qyzmetine silteme jasap.
Vedomstvonyń málimetinshe, búgin Podhoz kenti aýmaǵynda «Kókshetaý – Shýche» tas jolynyń 7 shaqyrymy tusynda dala órtendi.
«Qyzyl jalyn 20 gektar aýmaqty sharpydy. Órtti sóndirýge TJD jeke quramynan 96 adam jáne 10 órt sóndirý tehnikasy, M.Ǵabdýllin Azamatyq qorǵaý akademiiasynyń 28 qyzmetkeri jáne 1 tehnikasy, «Buqpa» orman sharýshylyǵy mekemesiniń 25 qyzmetkeri jáne 5 tehnikasy jumyldyrylýda. Órtten zardap shekkender joq, sondai-aq, eldi-mekenderge de qaýp tónip turǵan joq. Qazirgi kezde órtti sóndirý jumystary odan ári jalǵasýda», - deidi vedomstovodan.
Aita ketsek, Aqmola oblysynyń Birjan sal aýdanynda naizaǵai túsip, dala órti órshidi, ony sóndirmekshi bolǵan er adamnyń denesin kúiik shalyp kóz jumǵan edi
Osy rette, Aqmola oblystyq TJD mamandary óńirde kúnniń aptap ystyq bolýyna bailanysty turǵyndaryn órt qaýipsizdigi erejelerin saqtaýǵa shaqyrady.
