Foto: rus.azattyq-ruhy.kz
Qarjylyq monitoring agenttigi jýrnalist Mihail Kozachkovtyń ustalǵany týraly aqparat taratty, dep habarlaidy Ulysmedia.kz.
Agenttik taratqan málimetke sáikes, jýrnalist «Qospaevtyń uiymdasqan qylmystyq tobyna reiderlik basyp alýlar jasaýǵa kómektesken» degen kúdikke ilinip otyr.
«Qospaev pen onyń sybailastary tanymal kásipkerlerdiń biznesin tartyp alýy teris qoǵamdyq rezonans týdyratynyn túsinip, Kozachkovtyń qyzmetterin reiderlik basyp alý qurbandaryna aqparattyq shabýyl jasaý maqsatynda paidalandy. Óz kezeginde, Kozachkov quqyq qorǵaý organdarynda kóp jyldyq tájiribesi bar dosy Býrhan Janseiitovty iri kólemdegi syiaqyǵa UQT múshelerine sybailastyq jasaýǵa tartty. Sońǵysy óziniń burynǵy bailanystary arqyly UQT qajettilikteri úshin, sonymen qatar keiin jariialaýǵa arnalǵan aiyptaityn aqparattardy jinady. Sonymen qatar, Janseiitov Kozachkovqa Telegramm-kanalyn moderatsiialaýǵa kómektesti, atap aitqanda, jýrnalistiń jariialanymdarynyń astyna UQT basqa múshelerimen birigip, kommentariiler ornalastyrý arqyly qoǵamdyq pikir qalyptastyrdy. Posttarǵa jaǵymsyz pikirler qaldyrǵan jazbalardy óshirip, paidalanýshylardy buǵattap otyrǵan», - delingen agenttiktiń habarlamasynda.
Qarjylyq monitoring agenttigi «tergeý barysynda Janseitov pen Kozachkovtyń óz qyzmettir úshin UQT múshelerinen 52 mln teńge syiaqy alǵany dáleldendi» dep aqparat taratady.
«Kásipker Ábdiǵapparovtyń sheshesi Júnisbekovaǵa tiesili «Esentai siti» jobasyndaǵy úlesti reiderlik basyp alý piǵylyn iske asyrý úshin Kozachkov Ábdiǵapparovtyń bedelin túsiretin birqatar maqala jariialady. Bul rette jýrnalist "Buqaralyq aqparat quraldary týraly" zań talaptaryn óreskel buzdy, óitkeni keibir jaǵdailarda ol kórineý jalǵan málimetterdi, sondai-aq banktik, otbasylyq jáne basqa da zańmen qorǵalatyn qupiiaǵa qatysty derekterdi taratty. Osy jyldyń sáýir aiynda kásipker Abdýllaev Qospaevtyń UQT múshesi – Shalin Rýslan tarapynan shyny ydystar shyǵaratyn zaýytty reiderlik basyp alý faktisi týraly jurtshylyqqa júgindi, olar zańdy menshik iesin basqarýdan shettetýge tyrysty. Jolǵa qoiylǵan shema boiynsha, UQT múddesi úshin áreket ete otyryp, Kozachkov zaýyt iesiniń bedelin túsiretin birqatar maqalalar jariialady. Bul rette Almaty oblysy turǵyndarynyń alkogol ónimimen ýlanýy jáne jábirlenýshiniń qasaqana kisi óltirýge qatysy bar ekendigi týraly kórineý jalǵan málimetter taratyldy», - delingen habarlamada.
Agenttik sonymen qatar, «2022 jyldyń shilde aiynyń basynda Qospaevtyń UQT músheleri qarjylyq monitoring organdary olardyń qylmystyq áreketterin áshkereleý boiynsha jedel is-sharalar men tergeý júrgizip jatqanyn quqyq qorǵaý organdaryndaǵy derekkózderi arqyly bilgenin» habarlaidy. «Jasalǵan qylmystary úshin qylmystyq jaýapkershilikke tartylýdan qorqyp, UQT músheleri Tanashev, Shalin, Kospaev Aidos Kozachkov pen Janseiitovtyń qatysýymen Eldos Kospaevtyń úilestirýimen tergeý organynyń bedelin túsirý jáne onyń jumysyna kedergi jasaý josparyn iske asyrdy» delingen.
«Osy jyldyń 12 shildesinde Almaty qalasynda Janseiitov UQT belsendi múshesi - Aidos Qospaevqa baqylaýdy júrgizgen jedel qyzmetkerlerdiń mashinasynyń jolyn buǵattady. Aldyn ala daiyndalǵan stsenarii boiynsha advokattar men Kozachkov oqiǵa ornyna keldi, olar qorǵaýshylardy jasyryn baqylaýdy áshkerelegeni týraly jalǵan málimetterdi kópshilikke tarata bastady. Billing pen baqylaý kameralaryn qoldaný arqyly jedel mashinanyń sol kúni nemese aldyńǵy birneshe kúnde advokattardyń júrý baǵyty boiynsha múldem qiylyspaǵany senimdi túrde anyqtaldy. Kozachkov naqty derekterdiń burmalanýymen bailanysty jaǵdaidy UQT múddesi úshin qamtyp qana qoimai, olardyń is-áreketterin sol jerde úilestirdi jáne Qospaev Aidosqa baqylaýdan jasyrynýǵa múmkindik berdi. Nátijesinde sońǵysy izdeýge jariialandy. Buryn habarlanǵandai, óziniń jazasyzdyǵyn sezingen Janseiitov, zańdy ashyq túrde taptap, buzaqylyq áreketter jasap, quqyq qorǵaý organynyń qyzmetkeriniń denesin qasaqana jaraqattaǵan. Budan basqa, Kozachkovqa jáne basqa tulǵalarǵa qatysty memlekettik qupiialardy quraityn málimetterdi zańsyz jinaý jáne taratý faktileri boiynsha qylmystyq is tergelýde. Qazirgi ýaqytta tergeý jalǵasýda, Kospaevtyń UQT músheleriniń basqa da qylmystarǵa qatysy bar-joǵy tekserilýde», - dep habarlaidy agenttik.
