Foto: Otyrar.kz
Júrgizýshi kýáligine emtihandardy tapsyrý erejeleri antikormonitoringinen keiin ózgertildi, dep habarlaidy "Ult aqparat" Antikor baspasóz qyzmetine silteme jasap.
Sybailas jemqorlyqqa qarsy qyzmet IIM-men birlesip arnaiy HQKO qyzmetine monitoring júrgizdi. Oǵan birneshe jyl boiy kólik quraldaryn zańsyz resimdeýmen ainalysqan qylmystyq topqa qatysty qylmystyq ister sebep bolǵan.
"Sybailas jemqorlyqqa qarsy monitoring barysynda avtokólikterdi zańsyz tirkeý jáne júrgizýshi kýálikterin berý sharttary anyqtaldy.
Aqparattyq júielerdiń osaldyǵy, protsesterdi jetkiliksiz tsifrlandyrýy, avtokólikti tirkeý rásiminiń jetildirilmegendigi, emtihandardy qabyldaý rásiminiń quqyqtyq olqylyqtary, avtomektepterde atústi oqytý – osy faktorlardyń barlyǵy zańsyz deldaldyq qyzmetterdiń paida bolýyna yqpal etti.
Monitoring nátijeleri boiynsha Sybailas jemqorlyqqa qarsy is-qimyl agenttigi ýákiletti memlekettik organdardyń atyna 22 usynys joldady. Qazirgi tańda usynystardyń jartysynan kóbi oryndaldy.
Máselen, IIM óziniń barlyq aýmaqtyq bólimshelerinde avtokólik quraldarynyń derekqoryn túzetýge qoljetimdilikti japty. Sonymen qatar, Ishki ister ministriniń buiryǵymen júrgizýshi kýálikterin berý rásimi kúsheitildi. Onda emtihan alýshylardyń mindetti biometriiasy men testileýdiń barlyq protsesin beinetirkeý engizildi, emtihandardy qaita tapsyrý reglamenti ózgertildi" - delingen habarlamada.
Vedomstvo málimetinshe, pilottyq rejimde arnaiy HQKO men IIM-de jańa aqparattyq júieler iske qosylǵan. Júiede avtomobilderdiń derekterin, mindetti tólemder men alymdardy, aiyppuldardy avtomatty tsifrlyq salystyrý tetikteri kózdelgen, kez kelgen túzetýler úshin múmkindikter alynyp tastalǵan.
"Sonymen qatar, arnaiy HQKO qyzmetkerlerin sybailas jemqorlyq quqyq buzýshylyq sýbektilerine jatqyzý usynyldy. Zań jobasy QR Parlamentinde qaralyp jatyr.
Qabyldanyp jatqan sharalarǵa qaramastan, mamandandyrylǵan HQKO-larda qujattardy resimdeýge kómek usynatyn tulǵalar áli de bolýy múmkin. «Kómekshilerdiń» zańsyz qyzmetterine júginbeýińizdi suraimyz. Eger siz osyndai faktilerge tap bolsańyz, onda Antikorǵa 1424 qysqa nómiri boiynsha dereý habarlańyz.
Arnaiy HQKO qyzmetindegi sybailas jemqorlyq faktorlaryn joiý Antikorrýptsiialyq qyzmettiń baqylaýynda" - delingen agenttik habarlamasynda.
