QR Eńbek jáne halyqty áleýmettik qorǵaý ministri Serik Shápkenov óndiristik jaraqat pen ziiandy eńbek jaǵdailaryn azaitý sharalary týraly baiandady, dep habarlaidy QazAqparat.
«Jumyskerlerdiń qolaisyz eńbek jaǵdaiy ekonomikalyq shyǵyndarǵa ákep soǵady. Jyl saiyn óndiriste jaraqat alyp, ýaqytsha eńbekke jaramsyz bolǵan azamattarǵa jumys berýshi tarapynan 1,5 mlrd teńge tólem júrgiziledi. Jumyskerlerdi óndiristegi jazataiym oqiǵalardan saqtandyrý úshin jumys berýshiler jyl saiyn saqtandyrý kompaniialaryna 30 mlrd teńgeden astam saqtandyrý syiaqylaryn aýdarady», - dep atap ótti S. Shápkenov Úkimet otyrysynda.
Sonymen qatar jumys berýshiler 2020 jyly ziiandy eńbek jaǵdaiyndaǵy jumys úshin ártúrli ótemaqylarǵa 141,5 mlrd teńge jumsaǵan, bul 2019 jylmen salystyrǵanda 10%-ǵa kóp.
«2014 jyldan bastap 13 myńnan astam jumys berýshi jyl saiyn ziiandy eńbek jaǵdaiynda jumys isteitin jumyskerleri úshin 40 mlrd teńgeden astam mindetti kásiptik zeinetaqy jarnalaryn aýdardy. Óz kezeginde jumys berýshiler jumyskerlerdi basqa qaýipsiz jumys oryndaryna aýystyrý arqyly, jumys jaǵdaiyn jaqsartý arqyly atalǵan shyǵyndardy qysqartyp, júktemesin azaitýǵa bolar edi», - deidi Eńbek ministri.
Ministrlik Prezidenttiń qaýipsiz eńbek jaǵdailaryn qamtamasyz etý tapsyrmasyn oryndaý maqsatynda 2025 jylǵa deiingi qaýipsiz jumys kúshin qamtamasyz etý sharalary josparyn ázirledi jáne Úkimetke engizdi.
«Aldaǵy bes jylda is-sharalar josparynda eńbekti qorǵaýdy basqarýdyń ulttyq júiesin jańǵyrtý, jumys ornyndaǵy kásiptik táýekeldi tómendetý úshin jumys berýshilerdi ekonomikalyq yntalandyrý jóninde usynystar ázirleý, eńbekti qorǵaý salasyndaǵy kásibi quzyretter men ǵylymi áleýetti damytý kózdelgen. Olardy iske asyrý arqyly 2025 jylǵa deiin óndiristik jaraqattyń úlesin 10%-ǵa, ziiandy eńbek jaǵdailarynda jumys isteitinderdiń sany 20% tómendeýi josparlanýda», - deidi Serik Shápkenov.
