2021 jyldan bastap joǵary oqý oryndary memlekettik emes óz úlgisindegi diplomdar beredi. Bul týraly QR BǴM Bilim jáne ǵylym salasyndaǵy baqylaý komitetiniń tóraiymy Gúlzat Kóbenova aitty, dep habarlaidy QazAqparat.
«Bolashaq mamandyqty jáne joǵary oqý ornyn tańdaǵan kezde qatelikke boi aldyrmaý óte mańyzdy. Sebebi, ózderińiz biletindei, 2021 jyldan bastap joǵary oqý oryndary memlekettik emes óz úlgisindegi diplomdar beredi. Sondyqtan JOO túleginiń keleshekte jumysqa qalai ornalasatyndyǵy, eńbek naryǵynan oryn alýy mańyzdy bolyp otyr. Ministrlik tarapynan 3 jyl qatarynan «Atameken» UKP-men birge JOO-lardyń reitingi júrgizilip keledi. Bul reiting ótken jyly 109 JOO arasynda júrgizildi. Osy oraidaǵy mańyzdy kriteriiler - JOO bitirgen adamnyń jumysqa ornalasý kórsetkishi, oǵan degen suranys, qansha ýaqyttyń ishinde jumysqa ornalasýy, tapqan jumysynyń ortasha jalaqysy», - dedi komitet tóraimy.
Máselen, onyń aitýynsha, ótken jyly joǵary oqý ornyn bitirýshilerdiń jumysqa ornalasý ýaqyty ortasha eseppen 3,5-5 aiǵa deiin sozylǵan. Al ortasha jalaqy 100 myń teńgeden bastalǵan.
«Jumysqa ornalasý kórsetkishin qaraityn bolsaq, 61 JOO túlekteriniń 50 paiyzǵa jýyǵy ǵana jumys tapqan. Tek jyldyń sońyna qarai ǵana bul kórsetkish 74 paiyzdan asyp otyr. Ókinishke orai, osy reitingtiń eń tómengi satysynda turǵan JOO-lar jylda qaitalanady. Bul reitingti ministrliktiń jáne Ulttyq kásipkerler palatasynyń saitynan qaraýǵa bolady. Aitalyq, qazirgi Aqtaý gýmanitarlyq-tehnikalyq ýniversiteti, Ortalyq Aziia ýniversiteti, Óńirlik áleýmettik-innovatsiialyq ýniversiteti, SILK WAY halyqaralyq ýniversiteti, Astana ýniversiteti reitingtiń tómengi satysynda tur. Ortalyq Qazaqstan akademiiasy, Saparbaev atyndaǵy institýt, Miras ýniversiteti, Syrdariia ýniversiteti túlekteriniń jumysqa ornalasý kórsetkishi tómen», - dedi Gúlzat Kóbenova.
