Óńirde shaǵyn jáne orta bizneste jańa kásip ashýda áiel azamatshalar belsendilik tanytýda. Olar memlekettik baǵdarlamalar kómeginiń arqasynda jeke isterin dóńgelentip otyr. Máselen, Uiǵyr aýdanynyń turǵyny Iýldýz Týraeva toqyma buiymdaryn óndirýmen ainalyssa, tekelilik Gúldana Ómirtaiqyzy kofeinia ashyp, igiligin kóre bastady. Ekeýi de nátijeli jumyspen qamtý jáne jappai kásipkerlikti damytýdyń «Eńbek» baǵdarlamasyna sáikes «Bastaý biznes» oqytý jobasyna qatysyp, grantqa ie bolǵandar, - dep habarlaidy Almaty oblysy ákiminiń baspasóz qyzmeti.
Iýldýz Týraevanyń aitýynsha, onyń áýel bastan ismerlikke qabileti men qyzyǵýshylyǵy erekshe bolǵan. Sondyqtan ol osy baǵytta jeke biznesin ashýdy jón kórgen. Óńirlik kásipkerler palatasyna júginip, «Bastaý Biznes» jobasy boiynsha kásipkerlik negizderin oqyp shyqqan. Keiin «Jas kásipker» baǵdarlamasy aiasynda 500 myń teńge kóleminde grantqa ie bolyp, bul qarjyǵa qajetti tigin mashinalaryn satyp aldy, sóitip óz tsehyn ashqan. Bul isten ózi ǵana paida taýyp otyrǵan joq, sonymen qatar 7 jergilikti turǵyndy jumyspen qamtyp otyr.
«Biz jasaǵan ónimder «Baby comfort» brendimen «Shonjyda jasalǵan» markasymen shyǵarylady. Qolymyzdan shyqqan buiymdarǵa óz aýdanymyzdan bólek Panfilov, Kegen, Raiymbek, Eńbekshiqazaq aýdandarynan da suranystar túsip jatady. Sondyqtan aldaǵy ýaqyta sheberhanany keńeitip, jumys ornynyń sanyn arttyrsam deimin», – deidi Iýldýz Týraeva.
Shaǵyn sheberhanasynda ismerler qalyńdyqtyń jasaýy, kólikterge qajet perdeler, as úi buiymdary siiaqty turmysqa qajetti zattarǵa tapsyrys qabyldaidy. Iu. Týraeva bolashaqta balalarǵa arnalǵan kiimder tigýdi de qolǵa almaqshy. Al Tekeli qalalyq ákimdiginiń málimetine súiensek, jas kásipker Gúldana Ómirtaiqyzy memlekettik grant esebinen kofeinia ashqan. Onyń bul bastamasyna «Biznes bastaý» arqyly oqýy úlken sep boldy. Úsh balanyń anasy Gúldana «Biznestiń jol kartasy 2020-2025» baǵdarlamasy aiasynda 2 mln teńge grantqa ie bolyp, qoǵamdyq tamaqtandyrý ortalyǵyn ashýǵa qajetti qural-jabdyqtar satyp aldy.
Qalanyń ortalyǵynda ornalasqan «MELISSA» kofeiniasynda qazir 3 adam jumys isteidi. Onda kofe jáne basqa da sýsyndardan bólek, konditerlik ónimder de pisiriledi. Kásipkerler palatasy Tekeli qalalyq filialynyń direktory Turysbek Jumadilov tek biyldyń ózinde «Bastaý Biznes» kásipkerlik negizderine oqytýdy 73 adam aiaqtaǵanyn aitady.
Jalpy biylǵy jyly Almaty oblysynda «Biznestiń jol kartasy», «Jumyspen qamtý jol kartasy», «Eńbek» baǵdarlamalary jáne «Jetisý» óńirlik baǵdarlamasy sheńberindegi qarjy kólemi 23 mlrd. teńgege jetkizilgen. Birinshi jarty jyldyqta somasy 7,5 mlrd. teńgelik 990 joba qarjylandyrylyp, 2750 turaqty jumys orny ashylǵan.
