Túrkistan oblysynda qoishy bótenniń 6 million turatyn malyn ysyrap etip, joq qylǵan, dep habarlaidy "Ult aqparat".
Keles politsiiasyna Jetisai aýdany turǵyndarynyń biri aryzdanyp keldi. Ol óz aryzynda 2018 jyldan beri Keles aýdany Birlik aýyldyq okrýgine qarasty qyrly jaiylym jerde ornalasqan mal qorasyndaǵy qoilaryn Jetisai aýdanynyń turǵynyna senip tapsyrǵanyn aitady.
2020 jyldyń qarasha aiy men 2021 jyldyń qańtar aiy aralyǵynda mal basyn túgendep, arnaiy ekpesin saldyrýǵa kelgende qoishynyń árqaisysy 40 000 teńge bolatyn 155 bas saýlyq qoiyn jasyryn jymqyryp, ysyrap etip jibergenin kóredi.
Jábirlenýshige kelgen materialdyq shyǵyn kólemi 6 million teńgeden asady.
Sondyqtan, aryzdanýshy aýdandyq tártip saqshylarynan zańdy shara qoldanyp, keltirilgen shyǵyndy óndirýge yqpal jasaýdy suraǵan.
Atalǵan jait QR QK-niń 189-baby «Senip tapsyrylǵan bóten múlikti iemdený nemese ysyrap etý» boiynsha tirkeldi.
Politsiia qyzmetkerleri jedel is-sharalar júrgizý barysynda, qoishy bolyp jumys istegen kúdiktini ustady.
Politsiia qyzmetkerleriniń anyqtaýynsha, kúdikti qoishy mal baǵyp júrgen jyldardyń sońǵy 3 ai ishinde oǵan senip tapsyrylǵan qoilardyń bir bóligin zańsyz ysyrap etip, kúnine 3-4 bas qoidan satyp otyrǵan.
Aqshasyn óz qajetine jumsaǵan. Qazirgi ýaqytta kúdikti óz kinásin tolyǵymen moiyndap otyr.
Búginde bóten múlikti iemdený jáne ysyrap etý deregi boiynsha sotqa deiingi tergeý amaldary júrgizilýde. Kúdikti eshqaida ketpeý boiynsha mindettemede.
Óz kezeginde Túrkistan oblysynyń politseileri mal ielerine qyraǵy bolý jáne óz múlkiniń saqtalýyn qadaǵalaý qajettigin eskertedi.
Úi malyn jaiylymdarda qaraýsyz qaldyrýǵa bolmaidy, sondai-aq ony tanymaityn adamdarǵa baǵýǵa senim bildirmeńiz.
Mal ustaityn qora-jaidy myqty qulyptarmen nyǵaitý qajet, sondai-aq maldy syrǵalap, en-tańbalaryn ornatý kerek.
Eger siz mal urlyǵynyń kýágeri nemese mal urlaýdyń qurbany bolsańyz, tez arada «102» telefonyna habarlasyńyz.
