Jetinshi qabattan qulaǵaly turǵan balany qutqaryp qalǵan jasóspirimge 3 bólmeli páter berildi. Bul týraly batyr jigit Esdáýlet Dáýitbekovtiń ózi málim etti, dep habarlaidy QazAqparat agenttigi.
«Bizdi búgin G-Park kompaniiasy shaqyrdy. 3 bólmeli páter berdi. Erteńnen bastap qujattardy rásimdeimiz dedi. Al, bizdiń dál qazirgi turyp jatqan úiimizdi ipotekaǵa alǵanbyz», - dedi Esdáýlet Dáýitbekov.
Sonymen qatar, Esdáýlet oqiǵanyń mán-jaiyn ózi tolyq baiandap berdi.
«Men aýlada fýtbol oinap júrgenmin. Kórshilerdiń barlyǵy jinala bastady. Men de baryp mán-jaidy bilmek boldym. Sóitsem, kishkentai bala terezeniń aldynda tur eken. Terezege maskettik tor taǵylǵan. Ol úzilýge sál qalypty. Keiin men 7-qabatqa kóterilip, bala turǵan úidiń esigin qaqtym. Úide úlkenderden eshkim bolmady. Sosyn páter ieseniń ruqsatymen kórshi úidiń balkonynan shyǵyp, balany aman saqtap qaldym dep aita alamyn. Búldirshin shamamen 3 jasta. Úige kirgende páterde taǵy da úsh bala bar eken. Anasy dúkenge ketken. Men balalardyń anasy kelgenge deiin búldirshindermen birge boldym. Kórshiler politsiia jáne tótenshe jaǵdailar qyzmetkerlerin shaqyrdy. Olar bir saǵattan keiin ǵana keldi. Al, bala ólim men ómir arasynda tur ǵoi. Sol bir saǵattyń ishinde ne bolatynyn bir Qudai biledi. Sondyqtan, oǵan deiin qarap tura almadym», - dedi ol.
Batyr jigit bul áreketin marapat alý úshin jasamaǵanyn jetkizdi. Degenmen, ony elep-eskergen qala turǵyndary men laiyqty qurmet kórsetip jatqan jandarǵa alǵysyn bildirdi.
