Áleýmettik jelilerde Halyk Bank bir uiymmen birlesip, barlyq qazaqstandyqqa investitsiialarmen ainalysýǵa múmkindik beretin jańa memlekettik baǵdarlamany iske qosqany týraly jarnama shyqty. Bul týraly QR Prezidentiniń baspasóz hatshysy Berik Ýáli habarlaǵan eken. Munyń bári ótirik, dep jazady Stopfake.kz saity.
Mundai mazmundaǵy memlekettik baǵdarlamanyń iske qosylǵany týraly BAQ-ta da, memlekettik organdardyń resmi resýrstarynda da habarlanbaǵan.
Jarnamada logotipi qoldanylǵan KTK telearnasynyń resmi saitynda Berik Ýálidiń osy taqyrypta jasaǵan málimdemesi týraly eshteńe aitylmaǵan.
Sondai-aq, Berik Ýálidiń Facebook-taǵy resmi akkaýntynda investitsiialarǵa arnalǵan memlekettik baǵdarlama týraly habarlamalar joq.
Halyk Bank saitynda da, áleýmettik jelilerdegi resmi paraqshalarynda da banktiń iri memlekettik baǵdarlamany júzege asyratyny týraly aqparat joq.
QR Ulttyq ekonomika ministrliginiń portalynda da mundai baǵdarlama jaily jazylmaǵan.
Qoryta aitqanda, taratylǵan jarnamalyq aqparat feik. Onda aitylǵan memlekettik baǵdarlama joq. Jarnamada alaiaqtyqtyń belgisi bar, qaskúnemder adamdardyń nemese kompaniialardyń attaryn paidalanyp, paidalanýshylardy fishingtik saittarǵa kirýge shaqyrady. Maqsat – Jeli paidalanýshylary týraly qupiia aqparatty alý: jeke akkaýnttardyń loginderi men parolderin, jeke derekterdi, tólem kartalarynyń derekterin, tipti jeke kýálikterdiń, tólqujattardyń jáne basqa qujattardyń nómirlerin.
Barshańyzdy tek resmi aqparatqa ǵana senýge shaqyramyz! Jańalyqtyń shynaiylyǵyn bizdiń portaldyń kómegimen tekserýge bolady. Ózińizdi qyzyqtyrǵan aqparatty t.me/stopfake_kz Telegram-arnasyna nemese +7 707 739 5599 WhatsApp nómirine jiberińiz.
