Foto: Jambyl oblysynyń ákimdigi
Jekemenshik mektepterde bilim alatyn balalar da ystyq tamaqpen qamtylatyn bolady. Bul týraly Májilis depýtattarynyń saýalyna Premer-Ministrdiń orynbasary Tamara Dúisenovanyń jaýabynda aitylǵan, dep habarlaidy Kazinform HAA.
«Menshik nysanyna qaramastan bilim berý uiymdarynda bilim alý kezeńinde balalardyń jekelegen sanattarynyń bilim alýshylary men tárbielenýshilerine qoldaý alýǵa kómek kórsetýdi, onyń ishinde bastaýysh synyp oqýshylaryna jáne halyqtyń áleýmettik osal sanattaryna tegin tamaqtandyrýdy uiymdastyrýdy kózdeitin túzetýler Qazaqstan Respýblikasynyń Úkimeti bastamashylyq jasaǵan „Qazaqstan Respýblikasynyń keibir zańnamalyq aktilerine bilim berý jáne bala quqyqtaryn qorǵaý máseleleri boiynsha ózgerister men tolyqtyrýlar engizý týraly“ zań jobasyna engizilgen. Zań jobasy respýblikalyq biýdjet komissiiasy otyrysynda qoldaý tapty jáne 11 memlekettik organmen jáne 20 jergilikti atqarýshy organmen kelisildi. Qazirgi ýaqytta zań jobalary Parlament Májilisinde qaralýda», — dedi Úkimet basshysynyń orynbasary jaýabynda.
Vitse-premerdiń atap ótýinshe, Qazaqstan zańnamasyna sáikes, memlekettik baqylaý bilim berý uiymdarynyń menshik nysanyna qaramastan barý arqyly profilaktikalyq baqylaý, memlekettik attestattaý, biliktilik talaptaryna sáikestigin tekserý jáne jospardan tys tekserý arqyly júrgiziledi. Onyń ústine árbir jekemenshik uiym memlekettik bilim berý uiymy siiaqty, bes jylda bir ret memlekettik attestattaý rásiminen ótedi. Bul rásim bilim berý qyzmetiniń memlekettik jalpyǵa mindetti bilim berý standartynyń talaptaryna sáikestigin baqylaýǵa baǵyttalǵan.
«Sonymen qatar bilim berý qyzmetteriniń sapasyn jaqsartý úshin bilim berý uiymdaryna qoiylatyn biliktilik talaptaryna keminde 90 paiyz shtattyq pedagogterdiń, internettiń eń tómengi jyldamdyǵynyń bolýy, tiisti pedagogikalyq beiin boiynsha jáne menedjment salasyndaǵy basshylarǵa arnalǵan kýrstardan ótken basshy men pedagogterdiń biliktilik talaptaryna sáikestigi bóliginde ózgerister men tolyqtyrýlar engizildi», — dedi Tamara Dúisenova.
