Foto Adil Sadykov
Almatyda «Jarqyn kúz» kúzgi naýqany aiasynda keń aýqymdy tazalyq pen kóshet otyrǵyzý jumystary júrgizilip jatyr.
Almatyda ekologiialyq jaǵdaidy jaqsartýǵa jáne qalany kógaldandyrýǵa baǵyttalǵan respýblikalyq «Taza Qazaqstan» baǵdarlamasy aiasynda aýqymdy ekoaktsiia ótti. «Jarqyn kúz» atty naýqan qaladaǵy 8 aýdan turǵyndaryn biriktirip, kóshe tazalaý men aǵash otyrǵyzý jumystaryna belsendi qatysty.
Aktsiia barysynda qalany kógaldandyrýǵa úles qosqysy kelgen árbir turǵynǵa aǵash jáne buta kósheti berildi. Turǵyndar jańa jasyl aimaqtardy óz úiiniń mańynda, kóshe boiynda jáne qalanyń saiabaqtarynda egýge atsalysty.
Foto Adil Sadykov
Ekologiialyq aktsiiaǵa jalpy sany 10 myńnan astam qala turǵyny qatysyp, 300-den astam tehnika men 1755 kommýnaldyq qyzmetker jumyldyryldy.
Foto Adil Sadykov
Is-sharadan jastar da shet qalmady. Olar mundai is-sharanyń mańyzdylyǵyn atap, árkimniń óz súiikti qalasyn tazalaý men kógaldandyrýǵa úles qosýǵa múmkindigi bolýy kerektigin aitty.
«Almatydaǵy jarqyn kúz – bul tek qala túrli túske boialatyn ýaqyt emes, sonymen qatar bizge týǵan shaharymyzǵa qamqorlyq tanytýǵa tamasha múmkindik. Senbilikke qatysý arqyly qoqys jinap qana qoimai, árqaisymyzdyń qalanyń tazalyǵy men jailylyǵyna úles qosa alatynymyzdy kórsetemiz. Biz birikkende kóshei tazalaý siiaqty qarapaiym árekettiń ózi Almatynyń bolashaǵyna qosqan úles. Bul bizdiń qalamyz, onyń sulýlyǵy – bizdiń qolymyzda», – dedi Almaty qalasynyń Jastar saiasatyn damytý memlekettik qorynyń direktory mindetin atqarýshy Baǵdat Anarbaeva.
Senbilikke balalar da belsendi qatysty, olar eresektermen birge qoqys jinap, aǵash otyrǵyzdy.
«Balalardyń senbilikke qatysýy – tazalyqqa kómektesý ǵana emes, bul jaýapkershilik pen týǵan qalasyna degen súiispenshilikke tárbieleý. Osyndai qarapaiym is-áreket arqyly olar qorshaǵan ortaǵa uqypty qaraýdy úirenedi jáne tazalyq pen tártip árqaisymyzǵa bailanysty ekenin túsinedi. Búgin olar japyraq jinaýǵa kómektesip jatyr, al erteń qorshaǵan álemdi jaqsartýǵa tyrysady», – dedi ata-analar.
Foto Adil Sadykov
Aýqymdy tazalyq jumystary barysynda demalys aimaqtary, saiabaqtar, skverler jáne aýla mańy tazartylyp, shamamen 4 myń tekshe metr qoqys jinaldy. Jinalǵan qoqys qala ákimdiginiń kúshimen poligonǵa shyǵaryldy.
Foto Adil Sadykov
Qala aýmaǵyn tazalaýmen qatar, sharanyń simvoldyq jetistigi 10 myńnan astam aǵash otyrǵyzý boldy. Almatylyqtardyń basty jinalý orny jańa ALA parki bolyp, onda shamamen 1200 kóshet otyrǵyzyldy. Sondai-aq, jasyl jelek Gagarin dańǵyly boiyndaǵy býlvarda, Alataý aýdanynda, Jeltoqsan saiabaǵynda, Kókjiek shaǵyn aýdany jáne t.b. jerlerde otyrǵyzyldy.
Foto Adil Sadykov
Aktsiia halyq tarapynan úlken qoldaý tapty. Is-sharaǵa Qazaqstannyń halyq artisi Altynbek Qorazbaev ta qatysty. Ol mundai aktsiianyń ótkizilýin jaily qalalyq orta qalyptastyrýdaǵy mańyzdy qadam dep atap ótti.
«Osyndai sharalar jastardyń súiikti qalamyzǵa degen jaýapkershilik sezimin tárbieleidi. Arý qala Almatymyz gúldene bersin!» – dep batasyn berdi.
