Japoniiada beisenbi kúni 600-den astam adam koronavirýs juqtyrǵan. Bul – eldegi sońǵy úsh aidaǵy eń kóp kórsetkish, dep habarlaidy Kyodo.
Kyodo agenttiginiń málimdeýinshe, el astanasy tek Tokionyń ózinde bir kúnde –rekord 286 jaǵdai tirkelgen. Bul mamyr aiynda tótenshe jaǵdai toqtatylǵannan keiin indettiń qaita órshi bastaǵanyn kórsetedi. Japoniiada pandemiia kezinde jalpy 23 600 koronavirýs juqtyrýǵa qatysty jaǵdai tirkelgen.
Qazir Tokioda koronavirýs juqtyrǵandar sany 8 640 adamǵa jetti. Tokio gýbernatory Iýriko Koikeniń túsindirýinshe koronavirýstyń astanada tez kóbeiip ketýine kún saiyn 4 myńnan astam test jasala bastaýy sebepshi bolǵan.
Tokiony qorshap turǵan úsh prefektýra - Chiba, Kanagava, Saitama sonymen qatar Osaka prefektýrasynda sońǵy táýlikte COVID-19 juqtyrýshylardyń rekord sany tirkelgen. Bul elde 25 mamyrda tótenshe jaǵdai toqtatylǵannan keiin alǵash bolyp otyr. Osakada 66 adam koronavirýs juqtyrsa, Saitamda – 49, Kanagavta 48, Chibada 32 naýqas tirkelgen.
«Biz Tokioda virýs juqtyrǵandardyń orta jastaǵy adamdar arasynda kóbeiip ketýine alańdap otyrmyz», - dedi indetke qarsy sharalardy ázirleýge jaýapty ministr Iasýtoshi Nisimýra. Onyń aitýynsha, úkimet qaitadan tótenshe jaǵdai jariialamas buryn jaǵdaidyń betalysyn jiti qadaǵalap otyrmaq.
Sársenbi Tokio biligi COVID-19-dy jańadan juqtyrǵandar sany kóbeiýine bailanysty tórt deńgeili dabyldyń eń joǵarǵysyn jariialady. Qala turǵyndaryna asa mańyzdy emes basqa óńirlerge saparynan bas tartý, túngi klýb pen meiramhanalarǵa barmaý usynyldy.
