Aýyl sharýashylyǵy ministri Erbol Qarashókeev úi janýarlarynyń jeke sáikestendirý nómirine qatysty túsinik berdi, dep habarlaidy QazAqparat.
«Biz sondai-aq jeke sektordaǵy veterinariialyq praktikany damytý úshin adamdardyń densaýlyǵyna qaýip tóndirmeitin aýrýlardyń 5 túri boiynsha kúresý men aldyn alý jumystaryn básekelestik ortaǵa berip, salany keńeitpekpiz», - dedi Qarashókeev Ortalyq kommýnikatsiialar qyzmetinde.
Onyń aitýynsha, veterinariia salasyn tsifrlandyrýǵa erekshe mańyz beriledi.
«Qazirgi ýaqytta biz jańa baǵdarlamalyq ónimniń alǵashqy jumystyq nusqasyn ázirleýdi aiaqtap jatyrmyz. Bul jergilikti jerden aqparat qalyptastyrý, ony Janýarlar týraly ortalyq derekqorǵa berý protsesterin tolyǵymen avtomattandyrýǵa jáne osy protsesterdiń barlyǵyna adami faktor áserin boldyrmaýǵa múmkindik beredi. Veterinariialyq mamanda osy baǵdarlamanyń mobildi qosymshasy bolady, ol ony qaǵazbastylyqtan bosatady. Janýarda adamnyń jeke sáikestendirý nómiri siiaqty bir ǵana sáikestendirý nómiri bolady dep boljanýda. Ol janýardyń ómirlik tsikliniń búkil kezeńinde teri astyndaǵy chipte ornalasady. Kelesi jyly atalǵan baǵdarlamany bir aýdannyń bazasynda testilik rejimde synaqtan ótkizip, tolyq pysyqtalǵannan keiin 2023 jyldan bastap respýblika boiynsha kezeń-kezeńimen engizýdi josparlap otyrmyz», - dedi ministr.
