Foto: Videodan skrin
Túrkistan oblysynyń Otyrar aýdanynda 6 jastaǵy qyzǵa qatysty oqiǵa qoǵamnyń alańdaýshylyǵyn týdyrdy. Jábirlenýshi taraptyń aitýynsha, joǵary synyp oqýshysy búldirshinge tiispek bolyp, zorlyq áreketine talpynǵan. Alaida bir ai ótse de kúdikti qamaýǵa alynbaǵan, dep habarlaidy Ult.kz «Informbiýro» baǵdarlamasyna silteme jasap.
Ata-anasynyń sózinshe, oqiǵa aýyl mańyndaǵy jyńǵyl arasynda bolǵan. Sabaqtan keshikken qyz úiine jylap kelip, ústi-basy alba-julba kúide bolǵan. Sol kezde ol ózine joǵary synyp oqýshysy tiiskenin aityp, kómek suraǵan.
Jábirlenýshiniń anasy qyzyn birden Túrkistan qalasyna aparyp, dárigerge teksertkenin aitty. Dáriger zorlyq áreketine talpynys bolǵanyn, alaida qyzdyq perdesine zaqym kelmegenin jetkizgen. Keiin bul qorytyndyny resmi túrde jazyp berýdi suraǵanda, mamandar saraptamaǵa aralasa almaityndaryn aitqan. Osydan keiin ata-ana «102» nómirine habarlasyp, qylmystyq is qozǵatýǵa májbúr bolǵan.
Alaida sodan beri is alǵa jyljymaǵanyn aitqan ana mektep tarapynan da qysym bolǵanyn jetkizdi. Onyń aitýynsha, eki aptadan keiin mektep ákimshiligi qyzdy sabaqqa jiberýdi talap etken. Qaýipsizdigine alańdaǵan ata-ana birinshi synyp oqýshysyn mektepke jiberýden bas tartqan.
Jábirlenýshi tarap tergeý barysyna da narazy. Olardyń aitýynsha, saraptama der kezinde taǵaiyndalmaǵan, al kúdikti áli kúnge deiin qamaýǵa alynbaǵan.
Al Túrkistan oblystyq politsiia departamenti bul is boiynsha tergeý jalǵasyp jatqanyn málimdedi.
Vedomstvonyń habarlaýynsha, sot-meditsinalyq saraptama nátijesinde qyzdyń denesine zaqym kelmegen.
"Bastapqy tergeý is-sharalarynyń nátijeleri boiynsha kámeletke tolmaǵan qyzǵa qatysty quqyqqa qaishy is-áreketter anyqtalmady. Soǵan qaramastan sotqa deiingi tergep-tekserý jalǵasýda. Qorytyndysy boiynsha zańǵa sáikes protsestik sheshim qabyldanady", – delingen politsiia jaýabynda.
