Foto: Ashyq derekkóz
Doping daýyna bailanysty Jánibek Álimhanuly World Boxing Organization (WBO) sheshimimen 2025 jylǵy 2 jeltoqsannan 2026 jyldyń sońyna deiin kásipqoi bokstan ýaqytsha shettetildi. Soǵan qaramastan, uiym boksshynyń chempiondyq belbeýlerin ózinde qaldyrýǵa sheshim qabyldady.
Sheshim jariialanǵan soń Álimhanuly jankúierlerine úndeý jasap, titýldy saqtap qalǵanyna qýanyshty ekenin jetkizdi.
«Allaǵa shúkir! WBO chempiondyq titýlyn saqtap qaldyq! Jeltoqsanda ringke oralamyz! Qoldaý bildirgen barshańyzǵa raqmet!» – dedi ol.
WBO tártiptik komiteti sportshynyń buǵan deiin antidoping erejelerin buzbaǵanyn, tergeý barysynda tolyq yntymaqtastyq tanytqanyn jáne bul onyń alǵashqy quqyqbuzýshylyǵy ekenin eskerip, jeńildetýshi mán-jai retinde qabyldaǵan.
Endi boksshy 2026 jyldyń sońynda sharshy alańǵa qaita oralyp, ýaqytsha chempiondyq belbeý iesimen jekpe-jek ótkizýi tiis.
Aita keteiik, 2025 jyldyń jeltoqsanynda Jánibek WBA chempiony Erislandi Laramen úsh titýldy biriktirý aiqasyna shyǵýy josparlanǵan edi. Alaida Voluntary Anti-Doping Association (VADA) júrgizgen doping synamasy nátijesinde onyń aǵzasynan meldonii tabylyp, jekpe-jek ótpei qaldy.
Keiin sportshynyń komandasy onyń tyiym salynǵan preparat qoldanbaǵanyn málimdep, qaita tekserý júrgizýdi surady. Degenmen «B» synamasy da oń nátije kórsetti.
