Foto: gov.kz
Jańa Konstitýtsiia jobasyndaǵy tsifrlyq ortany retteýge qatysty usynystar Almaty oblysynyń turǵyndary úshin airyqsha mańyzdy. Bul týraly oblys máslihatynyń tóraǵasy Qýat Baiǵojaev Konstitýtsiialyq komissiianyń 11-shi otyrysynda málimdedi.Onyń aitýynsha, Almaty oblysy – halyq tyǵyz qonystanǵan, tsifrlyq servister belsendi iske qosylǵan óńirlerdiń biri. Sondyqtan, ulttyq ekonomikanyń ósý draiverine ainalýy tiis «Alatau City» jobasy dál osy óńirde qolǵa alynyp jatyr.
«Búginde azamattardyń qaýipsizdigi máselesi qalyptasqan uǵymdar sheńberinen shyǵyp, tsifrlyq tehnologiialar deńgeiine deiin kóterilgenin kórip otyrmyz. Tsifrlyq tehnologiia qoǵamnyń barlyq salasyna aralasyp, kúndelikti adam ómiriniń ajyramas bóligine ainaldy. Al jańa Konstitýtsiia jobasynda azamattardyń tsifrlyq saladaǵy quqyǵyn qorǵaý mindeti qarastyrylǵany – búgingi kún talaby ekeni daýsyz», – dedi Qýat Baiǵojaev.
Óz sózinde spiker azamattardyń ózara hat-habar almasý qaýipsizdigi, elektrondy kommýnikatsiia, derbes derekterdiń qorǵalýy syndy máselelerdiń qamtylýy jeke ómir qupiiasynyń kepildigin nyǵaityp, tsifrlyq servisterge degen senimdi kúsheitetinin jetkizdi.
«Olardyń konstitýtsiialyq deńgeide bekitilýi tsifrlyq qaýipsizdik salasyndaǵy zańnamany ári qarai damytý tájiribesine berik negiz bola alady. Usynylyp otyrǵan ózgerister azamattar úshin naqty máselelerden kórinis tabýy qarapaiym azamattardyń kúndelikti ómirde alańsyz bolyp, qoǵamnyń memlekettik institýttarǵa degen seniminiń kúsheitýge áser etedi», – dedi ol.
Sóz sońynda Komissiia múshesi Konstitýtsiia jobasy jetkilikti pysyqtalǵanyn jáne ony búkilhalyqtyq referendýmǵa shyǵarýǵa bolatynyn aitty.
