Jambyl oblysynda sońǵy qońyraýdan keiin 70-ten astam jasóspirim politsiiaǵa jetkizilgen, dep habarlaidy "Ult aqparat".
Quqyq buzýshylyq pen qylmystyń aldyn alý, sondai-aq kámeletke tolmaǵandardy qylmystyq ortaǵa tartýdy boldyrmaý maqsatynda aǵymdaǵy jyldyń 25 mamyrynda Jambyl oblysynyń barlyq mektepterinde sońǵy qońyraý merekesine arnalǵan is-sharalar kezinde politsiia qyzmetkerleri jastar kóp jinalatyn oryndarda patrýldik qyzmet jasaqtarynyń jumysyn kúsheitti, shomylý oryndaryn da qadaǵalaýǵa aldy.
Sondai-aq, qoǵamdyq tártipti buzýdy, onyń ishinde mektep oqýshylarynyń qatysýymen oryn alýy múmkin jol-kólik oqiǵalarynyń aldyn alýǵa qatysty jaǵdaidy baqylaý maqsatynda Politsiia departamentiniń Jergilikti politsiia qyzmeti basqarmasy, qalalyq jáne aýdandyq politsiia bólimderiniń basshylary qatarynan jedel shtabtar qurylǵan.
Mobildi toptardyń reidteri barysynda ishki ister organdaryna 72 kámeletke tolmaǵan bala jetkizildi, 76 ata-ana men ózge de zańdy ókilder ákimshilik jaýapkershilikke tartyldy.
«Kámeletke tolmaǵandardyń túngi ýaqytta oiyn-saýyq mekemelerinde bolǵany úshin kafe-bardyń 2 iesi jaýapkershilikke tartyldy. Dúkenniń eki iesi-alkogol ónimderin satý erejeleri týraly QR zańnamasyn buzǵany úshin, 71 ata-ana kámeletke tolmaǵan balalarynyń túngi ýaqytta oiyn-saýyq mekemelerinde jáne turǵyn úiden tys jerde bolǵany úshin ákimshilik jaýapkershilikke tartyldy. Tutastai alǵanda, oblys boiynsha is-sharalar ótkizý barysynda tótenshe jaǵdailar oryn alǵan joq. Kámeletke tolmaǵandardy zańsyz áreketterge tartý derekteri anyqtalmady», - dep atap kórsetti oblystyq Politsiia departamentiniń Jergilikti politsiia qyzmeti basqarmasy iývenaldy politsiia tobynyń erekshe tapsyrmalar jónindegi aǵa inspektory politsiia polkovnigi Qýanyshbek Qaljanov.
