QR Premer-ministriniń birinshi orynbasary Nurlybek Nálibaev Ulytaý oblysyna jumys sapary aiasynda Jezqazǵan – Qaraǵandy avtojolyn qaita jańǵyrtý jobasynyń resmi bastalýyna qatysty, dep habarlaidy ult.kz.
Jobanyń jalpy uzyndyǵy – 572 shaqyrym. Onyń 335 shaqyrymy Ulytaý oblysynyń aýmaǵy arqyly ótedi. Respýblikalyq mańyzy bar jol qurylysynyń bastalý rásimine «QazAvtoJol» ulttyq kompaniiasy» AQ basqarma tóraǵasy Darhan Imanashev, Qaraǵandy oblysynyń ákimi Ermaǵanbet Bólekpaev, sondai-aq memlekettik organdardyń, merdiger uiymdardyń ókilderi qatysty.
«Bul – Memleket basshysynyń tikelei baqylaýyndaǵy, el úshin airyqsha mańyzy bar ári kópten kútken joba. Búgin onyń qurylysyna resmi túrde bastaý berilip otyr. Josparǵa sáikes joba 2029 jyly aiaqtalýy tiis. Degenmen merdiger uiymdarmen kelissózder júrgizip, tiisti mindetter júkteimiz. Negizgi maqsatymyz – qurylys qarqynyn jedeldetip, jobany múmkindiginshe erterek, iaǵni 2028 jyly aiaqtaý», — dedi QR Premer-ministriniń birinshi orynbasary Nurlybek Nálibaev.
Is-shara barysynda Ulytaý oblysynyń ákimi Dastan Ryspekov atalǵan jobanyń óńir úshin strategiialyq mańyzyna toqtaldy.
«Bul jol Astana men elimizdiń ońtústik óńirlerin Ulytaý arqyly bailanystyratyn mańyzdy kólik dálizi. Sondyqtan respýblikalyq mańyzy bar avtojoldy jańǵyrtýdy oblys turǵyndary ǵana emes, kún saiyn osy baǵytta qatynaityn myńdaǵan júrgizýshi men jolaýshy kópten beri kútti. Qarjylandyrý máselesi sheshilip, jobanyń naqty júzege asa bastaýy – barsha jurtshylyq úshin qýanyshty jańalyq. Osy mańyzdy bastamanyń júzege asýyna qoldaý kórsetken Memleket basshysyna, Úkimetke, sondai-aq jobany iske asyrýǵa atsalysyp jatqan barlyq azamattarǵa shynaiy rizashylyǵymdy bildiremin», — dedi oblys ákimi.
Jezqazǵan – Qaraǵandy avtojolyn qaita jańǵyrtý óńirdiń kólik infraqurylymyn jańa deńgeige kóterip, jol qozǵalysynyń qaýipsizdigin arttyrýǵa, júk jáne jolaýshylar tasymalynyń tiimdiligin jaqsartýǵa, sondai-aq Ulytaý oblysynyń áleýmettik-ekonomikalyq damýyna tyń serpin beredi.
