Foto: Pexels.com
Eńbek jáne halyqty áleýmettik qorǵaý ministrligi zeinetke shyqqan qazaqstandyqtardyń jumys isteýdi jalǵastyrýyna qatysty pikir bildirdi. Bul týraly Ult.kz aqparat agenttigi Tengrinews.kz portalyna silteme jasap habarlaidy.
Eńbek jáne halyqty áleýmettik qorǵaý ministrliginiń málimetinshe, elde jumysyn jalǵastyryp jatqan zeinetkerlerdiń esebi júrgizilmeidi.
"Zeinet jasyna jetken adamdar zeinetaqy ala otyryp, jumys izdeýshi retinde tirkele almaidy. Sonymen qatar, áleýmettik kodekstiń 99-babyna sáikes zeinetkerler jumyssyz retinde tirkelmeidi. Osyǵan bailanysty jumyspen qamtý organdary zeinet jasyna tolsa da, jumys istep jatqan qazaqstandyqtardy qadaǵalamaidy", – delingen habarlamada.
Ministrlik jumys kúshine jumyspen qamtylǵan jáne jumyssyz adamdar jatatynyn atap ótti. Al zeinetkerler jumys kúshine kirmeidi, biraq óz betinshe jumysqa ornalasýǵa quqyly.
"Zeinet jasyna tolǵan qyzmetkerdiń kásiptik jáne biliktilik deńgeii joǵary bolsa jáne eńbekke qabiletti bolsa, onymen eńbek sharty shekteýsiz jyl saiyn uzartylýy múmkin. Osylaisha, zeinetke shyqqan tulǵalardyń jumysyn jalǵastyrýǵa eshqandai shekteý joq", – dep málimdedi vedomstvo.
