Foto: baq.kz
Qazaqstan Respýblikasynyń Eńbek jáne halyqty áleýmettik qorǵaý vitse-ministri Viktoriia Shegai jýrnalisterge bergen suhbatynda zeinetaqy júiesin turaqty qarjylandyrý boiynsha Ulttyq bank pen Qarjy naryǵyn retteý jáne damytý agenttigimen birlesken jumys júrip jatqanyn málimdedi, dep habarlaidy Ult.kz.
“Ulttyq bank pen Qazaqstan Respýblikasynyń Qarjy naryǵyn retteý jáne damytý agenttigimen birlesip zeinet júiesin turaqty qarjylandyrý boiynsha memleket basshysynyń tapsyrmasy bar. Qazir osy mindet boiynsha jumys atqaryp jatyrmyz”, – dedi vitse-ministr.
Sonymen qatar, Viktoriia Shegai ázirge zeinet jasyn ózgertý týraly resmi bastama túspegenin atap ótti. Ol bul másele boiynsha jańa sheshimder qabyldanbas buryn, tek josparly jumys júrgizilip jatqanyn túsindirdi.
“Zeinet jasyn ózgertýdi qaita qaraý boiynsha ázirge bastama kelip túsken joq”, – dedi Viktoriia Shegai jýrnalisterdiń suraǵyna jaýap berý kezinde.
Memleket basshysynyń tapsyrmasyna sáikes, 2023 jyldan bastap bes jyl ishinde bazalyq zeinetaqynyń eń tómengi mólsherin eń tómengi kúnkóris deńgeiiniń 70%-yna, al eń joǵarysyn 120%-yna deiin kezeń-kezeńimen arttyrý kózdelgen.
Osyǵan bailanysty 2026 jylǵy 1 qańtardan bastap bazalyq zeinetaqynyń eń tómengi mólsheri 35 596 teńgeni, al eń joǵary mólsheri 60 005 teńgeni quraidy. Bul eń tómengi kúnkóris deńgeiiniń 118%-yna teń.
Mysaly, 2019 jyly zeinetke shyqqan, búginde 70 jastaǵy zeinetkerdiń 2025 jylǵy jalpy zeinetaqysy 171 588 teńge bolsa, 2026 jylǵy indeksatsiiany eskere otyryp, onyń zeinetaqysy 192 816 teńgege deiin ulǵaiady. Onyń ishinde bazalyq zeinetaqy – 60 005 teńge, yntymaqty zeinetaqy – 132 811 teńge. Bul somaǵa BJZQ-dan tólenetin tólemder kirmeidi.
