Foto: Májilistiń baspasóz qyzmetinen
Qazaqstanda saiasi júiede jańa kezeń bastalǵaly tur. Memleket basshysy Qasym-Jomart Toqaev jazda Parlament sailaýy ótetinin málimdedi. Sonymen qatar zań shyǵarý júiesinde de ózgeris bolmaq: buǵan deiin eki palatadan – Senat pen Májilisten turatyn Parlament endi bir palataly organǵa ainalyp, Quryltai dep atalýy múmkin. Aldaǵy saiasi naýqan qarsańynda qazirgi Májilis depýtattarynyń qyzmeti men aldaǵy josparlary da qoǵam nazarynda. Osy oraida Ult.kz tilshici halyq qalaýlylarynan depýtattyq qyzmetin qalai atqarǵany, ótken shaqyrylymdaǵy jumysyna kóńili tola ma, sondai-aq jańa Quryltai sailaýyna qatysý nieti bar-joǵy jóninde surap kórdi.Aidos Sarym:
«Bizdiki Halyqaralyq ister, qorǵanys jáne qaýipsizdik komiteti. Ótken jyldyń ózinde tarihymyzda bolmaǵan 7 zańdy qabyldadyq. Bul – Ulttyq qorǵanys salasyn jańa beleske kóteretin, jańa ásker túrin engizetin, azamattardyń patriotizmin kóbeitetin jáne basqa da baǵyttardaǵy zańdar. Osy maqsatta biz kúndelikti eńbektenip jatyrmyz. Eger bizdiń el úshin, otan úshin, qaýipsizdik pen egemendik úshin úlesiń qandai deitin bolsa, men jańaǵy zańdardy ákelip aldyńyzǵa qoia alamyn. Eń bastysy osy zańdardyń durys jumys isteýin qamtamasyz etý. Qudaiǵa shúkir armiianyń biýdjetin kóbeitip, 1 paiyzǵa deiin jetkizdik. Qarýlaný jáne basqa turǵydan tiisti ministrlik ainalysyp jatyr. Árine sheshilmegen másele kóp. Áleýmettik máseleler bar, álimjettik pen balalarymyzdyń ólip jatqany bar, bulardyń bári qoǵam retindegi bárimizdiń ortaq problemamyz dep esepteimin. Biraq zań shyǵarýshy retinde biz óz jumysymyzdy bir adamdai atqardyq».
Rinat Zaiyt:
«Jasyratyny joq, kelgeli «AMANAT» partiiasy fraktsiiasynyń múshesimin. Eger meniń kúsh-jigerim sailaýda partiiaǵa kerek bolsa, onda men daiynmyn. Biraq mende qaitadan depýtat bolatyn qalaý joq. Óitkeni basqa da salalarda jumys istep paidamyz tietin jerler kóp edi negizinde».
Muqash Eskendirov:
«Segizinshi shaqyrylymda bir mandattyq okrýgtan sailandym. Biraq ózim 2004 jyldan beri «AMANAT» partiiasynyń múshesimin. Osy 3 jylǵa jýyq ýaqyt ishinde 46 jumys tobyna qatysyppyn, 36 zańda 500-den artyq ózgeris usyndym, 137 depýtattyq saýalǵa qatysqanmyn. Sonymen qatar 500-den artyq ret óńirlerge baryppyn. Olardyń ishinde sheshilgen máseleler de bar, sheshilmegeni de bar. Ózim osy óńirden sailanǵannan keiin, óńirde biýdjettegi josparlardyń barlyǵynyń oryndalýyna qatystym. Sondyqtan Parlamenttegi jumysyma qanaǵattandym dep aitýǵa bolady. Árine taǵy da josparlar bar edi, arǵy jaǵyn Alla kórsetedi. 1 shildede zań boiynsha óz jumysymyzdy toqtatamyz. Quryltaiǵa sailaýǵa qatysamyn ba, joq pa, ony partiia shashady. Eger partiia qalasa ary qaratai da jumys isteýge ázirmiz».
Erlan Sairov:
«Biz depýtat bolamyz ba, bolmaimyz ba ony birinshi Qazaqstannyń halqy, ekinshi partiianyń basshylyǵy sheshedi. Óitkeni kelesi sailaý proportsionaldy júie boiynsha bolady. Iaǵni ol jerde biz halyq aldynda esep berip jáne sol bizdiń esepterimiz halyqty qanaǵattandyratyn bolsa, onda partiianyń basshylyǵy ózi derbes sheshim qabyldaityn bolady. Sondyqtan bul másele jóninde aitý áli erte. Árine biz biraz jumys atqardyq. Biraq bizdiń jumysymyz halyqty qanaǵattandyra ma, joq pa ekenin azamattarymyz sheshedi. Eger erteń biz sailaýǵa túsip jatsaq, sol túsken partiia jeńiske jetetin bolsa, onda árine halyq bizdiń jumysqa «qanaǵattandyq» dep daýys berdi dep aitýǵa barlyq negiz bar. Bizdiń jumysymyzǵa ádil baǵa beretin dana halqymyz».
Májilis depýtattary ótken shaqyrylymdaǵy jumystaryna ártúrli baǵa bergenimen, kópshiligi atqarylǵan isterdi nátijeli dep esepteidi. Al aldaǵy Quryltai sailaýyna qatysý máselesinde sheshimdi halyq pen partiia qabyldaitynyn atap ótti.
Baljan Jeńisqyzy
