Densaýlyq saqtaý vitse-ministri Ajar Ǵiniiat balasyna vaktsina saldyrýǵa kúmándanyp júrgen ata-analarǵa úndeý jasady, dep habarlaidy QazAqparat tilshisi.
«Balalardyń densaýlyǵy ár ata-ananyń qolynda. Balalar jas bolǵandyqtan, ázirge óz densaýlyǵy úshin sheshim qabyldai almaidy. Olar úshin bul sheshimdi ata-ana qabyldaýy kerek. Balany emdete me, profilaktikalyq shara ala ma – bári ata-ananyń qolynda. Qazir de osy infektsiianyń óte qaterli ekenin kórip otyrsyzdar. Ýaqytqa, mezgilge bailanysty kóptegen respiratorlyq virýstyq infektsiialardyń kóp ekenin, al miks sýperinfektsiianyń óte qatty asqynǵan túrde júretinin aitqym keledi. Sondyqtan, memleket álemdegi eń jaqsy, barlyq klinikalyq zertteýlerden ótken, eń tiimdi vaktsinany ákep otyrǵanda, bul múmkindikti paidalanǵandaryńyz durys», - dedi dedi Ajar Ǵiniiat tilshilerge bergen suhbatynda.
Vitse-ministr qazaqstanda Pfizer vaktsinasynyń jetkilikti qory bar ekenin, eldegi barlyq bala sanyna jetkilikti vaktsina kelgenin aitty.
«Árine, balalar vaktsinatsiiasy ata-ana sheshimine bailanysty bolǵandyqtan, ekpege túgel kelmeýi múmkin ekenin topshyladyq. Biraq, degenmen eldegi balalardyń barlyq sanyna jetetindei doza jetkizildi. Endi ata-analarmen birge balalardyń densaýlyǵyn qamtamasyz etý úshin jumys isteimiz. Meniń búkil de otbasym, barlyǵymyz vaktsina alǵanbyz. Basqa da týǵan-týystarym men dostarymdy kezdesken saiyn vaktsinaǵa úgitteimin, alyp ta jatyr. Halyqtyń qazir kózi jetti, aýrýdyń qiyn ekenin, vaktsina almaǵan adamdarmen tolǵanyn kórdi, kóptegen jaqyndaryn joǵaltty. Vaktsinanyń kerek ekenin halyq túsindi dep oilaimyz», - dedi A. Ǵiniiat.
Aita keteiik, QR densaýlyq saqtaý vitse-ministri Ajar Ǵiniiat pen Sanitarlyq-epidemiologiialyq baqylaý komitetiniń tóraǵasy Aijan Esmaǵambetova balalar vaktsinatsiiasyn baqylaý úshin elordalyq №71 mektep-litseige bardy.
